In Bastia, u zunamì di u seculu

U zunamì di u 16 aprile 2015 risicheghja di firmà cum'è pruverbiu per i Bastiacci.

A storia principia cù un terramotu nant'à l'isula di Creta, previstu di 6,1 nant'à a scala di Richter. Di chè alzà u livellu di u mare d'un metru ind'è noi, d'appressu à i spezialisti.

Tandu, i servizii di a prefettura tiranu i salti. I media sò prevenuti, ghjunghje u zunamì.

Catastrofa ! In Bastia i CRS facenu u giru di i stabilimenti di bor'di mare. S'è vo manghjavate in un risturante di u portu di Toga o di u Vechju Portu, avete forse avutu a furtuna di vede u vostru ripastu interrottu da un membru di e forze di l'ordine in sudatoghja.

Trippa per i sushis o per l'apperitivu. Evacuazione generale !

Ma in fatti nò, u contru ordine hè ghjuntu. Nisun periculu. Troppu tardi. Una mansa di bastiacci santavugliati fughjenu u mare per paura di u zunamì. Ci hè di chè, i pulizzeri eranu elli stessi spaventati è cunvinti di u perìculu.

Panicca nera in cità, tuttu u mondu piglia a strada di l'alture...

A prefettura cummunicheghja : "in fatti nò, pudete manghjà tranquilli, vultate puru". Hè troppu tardi. Prucessione di vitture chì scappanu à tavuletta versu E Ville è Cardu.

Nant'à Twitter, hè un zunamì dinù, ma di magagne.

Iè, Bastiacci risicheghjanu d'arricurdassi per una bella stonda di stu falsu zunamì di u 16 d'aprile. I cummercianti dinù chì anu vistu i so stabilimenti viutassi.

U prublema, hè chì s'ellu ghjunghje un veru zunamì, quale hè chì l'hà da crede avà, u prefettu ?