I più belli castelli di Corsica

1. San Culumbanu (Ruglianu)

Cù u Pumonte, u Capicorsu era terra di signori. In Ruglianu si ponu sempre vede e ruvine impressiunante di u castellu di San Culumbanu. Hè unu di i più antichi di Corsica (XIu seculu), è appartenia à a signuria Da Mare.

Ritrattu : DRAC / Alain Gauthier

2. Serravalle (Pratu di Ghjuvellina)

U castellu di Serravalle, situatu in a pieve di A Ghjuvellina, hè unu di i megliu cunservati di l'isula. Hè a pruprietà di i signori Amondaschi, chì tenianu a valle di Golu.

Ritrattu : Daniel Istria

3. Capula (Livia)

U situ di Capula hè unicu in Corsica : un'occupazione preistorica cù u situ di Cucuruzzu. È vicinu di questu quì si trovanu i resti di u castellu medievale di Capula. Appartenia à a signuria di i Biancolacci. Una storia millenaria...

Ritrattu : J.-F. Paccosi

4. Cinarca (Casaglione)

Stu castellu appartenia à una di e signurie e più impurtante di a storia : i Cinarchesi. U so castellu principiale supraneghja u golfu di Sagone. Ma ùn ferma più nunda : i Ghjenuvesi, in guerra contr'à elli, si sò appiegati per raschjà tuttu dop'à una terribule ripressione.

Ritrattu : Daniel Istria

5. Petrellerata (Zuani)

Trà Zuani è Pedicorti di Gaghju ci hè un pinzu induve i signori Cortinchi, una famiglia impurtante chì tenia u so territoriu da u venachese à a Casinca, avia fattu u so castellu. U locu hè impressiunante, difficiule d'accessu è inalpellatu.

Ritrattu : MAT

6. Cuvasina (Vintisari)

Situatu in Fiumorbu, si chjama dinù Castellu Alemanu o Castellu di Carlumagnu. A legenda dice ch'ellu saria statu fundatu da un certu Truffetta, signore alemanu di Mayence, mandatu in Corsica da Carlu Magnu per cumbatte i Sarragini. Cusì dicenu i crunachisti, ma a storia hè sempre mal cunnisciuta...

Ritrattu : www.ventiseri.fr

7. E Rocche di Sia (Ota)

U locu difensivu, nant'à un pentone appinzatu duvia prutege e Rocche di Sia, da i so nemichi. Ma i Ghjenuvesi anu finitu per lampà in pianu stu castellu di a signuria di Leca.

Ritrattu : Alain Gauthier

8. Biguglia

Quant'ellu n'hà vistu u castellu di Biguglia ! Si trova sopr'à u paese attuale. À l'orìgine hè un castellu di i signori di Bagnaia. Diventa più tardi locu di residenza di i guvernatori ghjenuvesi, attaccatu più tardi da Vincentellu d'Istria, eppo dopu distruttu da l'armate di Ghjenuva

Ritrattu : campuvallone.com

9. Lumitu (Scata)

U castellu di Lumitu in a pieve di l'Ampugnani era una furtificazione Cortinchi. D'appressu à a legenda, era unu di i lochi di una certa cuntessa Matilda. Ùn si sà veramente s'ella hà esistitu in veru, ma a memoria pupulare s'hè mantenuta.

Ritrattu : contu Flickr gypsyflores

10. U Palazzu di u Poghju (Poghju di Venacu)

D'appressu à e cronache di Ghjuvanni della Grossa, saria statu u castellu d'Ugu Colonna. Stu conte mìticu, principe rumanu, saria statu mandatu in Corsica ingiru à u IXu seculu per sbandisce i Sarragini. Ùn serà forse ch'è una legenda, ma stu castellu, vicinu da Corti, hè sempre quì.

Ritrattu : Le Mémorial des Corses / Cl. M.J. Costa

Bibliugrafia

Le Moyen-Âge en Corse, sott'à a direzzione di Daniel Istria, CRDP di Corsica, 2012.
Corse médiévale, sott'à a direzzione di Daniel Istria, Editions du patrimoine, 2014.
Le Mémorial des Corses, sott'à a direzzione di Francis Pomponi, 1980.
Cahiers Corsica, di a FAGEC.

Ringrazi à Mariadumenica Predali pè u so aiutu