Fatti d’America 3 : Stu tintu di Garfield... è u clientelismu in America

Presidenti americani assassinati ne cunniscimu almenu dui. Ognunu avarà digià vistu e fiure di u capu ribattutu di John Fitzgerald Kennedy, è si sarà forse interessatu à u misteru di a so morte (in più ci sarianu stati ancu i Corsi daretu à sta morte). Ognunu avarà intesu parlà di l’assassiniu – in u 1865 – d’Abraham Lincoln, u Presidente chì vulia affrancà i schjavi, ch’hà datu pettu à i Stati upposti, ch’hà pruclamatu l’emancipazione di i schjavi in u 1863 quandu ùn era ancu compia a Guerra di Secessione, eppo’ fattu aduttà u Tredicesimu emendamentu à a Custituzione (u stessu annu di a so morte) affinchè a schjavitù fussi sbandita d’America.

Più pocu saranu quelli ch'anu intesu parlà di l'assassiniu di u Presidente William McKinley in u 1901. Ellu fù tombu da un anarchistu, cum'è u Tsar Lisandru II, u Presidente francese Carnot, u Primu ministru spagnolu Cánovas, u Rè d'Italia Umbertu I, ecc. È ùn hè chè dopu a so morte chì i servizii sicreti saranu incaricati d'urganizà a prutezzione di i Presidenti americani.

Ma saremu di sicuru puchissimi à sapè qualcosa di u Presidente James Abram Garfield, ammazzatu in u 1881. Forse chì ancu per l’Americani, u nome di Garfield face subbitu pinsà à un misgione ingordu è furbu, è micca à un Presidente mortu di manera tragica. Infatti u creatore di u misgiu l’hà battizatu cusì in ricordu di u so babbone, ch’era statu chjamatu James Garfield in ricordu di u Presidente assassinatu. A leia c’hè quantunque, ma lascemu corre u misgiu...

C’interesseremu soprattuttu à u perchè. Forse ch’ùn saperemu mai cumu era cumposta a clicca ch’hà tombu à Kennedy, ma sapemu chì un anarchistu hà sbattutu à McKinley, è chì un partigianu di i Stati secessiunisti hà stinzatu à Lincoln. In quelli casi si tratta facilmente d’assassinii pulitichi, mutivati è cummessi à nome di una causa pulitica. Quellu ch’hà tombu à Garfield l’hà fatta ancu ellu per mutivi pulitichi... ma un pocu sfarenti quantunque.

Stu puvaracciu di Garfield hè statu tombu da un malavviatu bellu toccu, chì fiascava tuttu ciò ch’ellu intraprindia, tribbiava a so moglie, fù ripudiatu da a so famiglia, ecc. St’omu quì, Charles Guiteau, avia integratu una cumunità riligiosa utupista ind’è si spartia tuttu, a pruprietà, u travagliu è ancu e donne. N’hè partutu per pruvà di creà un cutidianu, The Daily Theocrat. Hè vultatu à a so cumunità, po’ n’hè ripartutu... Dopu hà circatu à fà u giuristu, nanzi di vultà à a teulugia, tuttu què passendu per parechje è parechje cumbriccule... U fattu si stà chì durante u so prucessu, u so avucatu u volsi fà passà per scemu è irrespunsevule di i so atti.

Ma tuttu què ùn ci dice micca perchè chì stu trapanatu hà tombu u Presidente di i Stati Uniti. Ebbè, dopu tutti sti fiaschi, Guiteau hà avutu l’idea d’impignassi in pulitica. Scrisse un discorsu à prò di u candidatu republicanu à e presidenziale di u 1880, eppo’ hà pritindutu chì quellu discorsu avia avutu un impattu tremendu per a vittoria di Garfield, è ch’ellu si meritava un postu in un imbasciata. Fece e so dumande ufficiale per Vienna, Parigi, Liverpool... è in più passava tuttu u so tempu in giru à a Casa Bianca è u Dipartimentu di Statu (l’affari stragneri), à infastidisce tutti i cunsiglieri è i dirigenti di u partitu chì li passavanu vicinu. Ma à mumentu datu, l’anu mandatu à fassi leghje in altrò. Ancu u Secretariu di Statu in persona l’hà dettu ch’ùn avaria mai stu postu, è ch’ellu ùn vinissi mai più à parlalli di què. Tandu ellu s’hà compru una pistola...

S’hà compru una pistola, è scrisse ch’ellu devia tumbà u Presidente à nome di Diu è per scioglie i prublemi interni à u partitu republicanu. È u peghju hè ch’ellu c’hè riisciutu... U 2 di lugliu di u 1881, Garfield stava per piglià u trenu in Washington, senza nissun’ agente di prutezzione (altri tempi...). Tandu hè stata faciule per Guiteau di tiralli duie balle è di circà à scappà. Ma ùn hè andatu tantu luntanu, è i pulizzeri ch’eranu in a gara l’anu purtatu à u postu, mentre chì a ghjente mughjava è u si vulia stirpà sopra locu.

Tandu Guiteau ripetia “eiu sò un Stalwart di i Stalwarts, è avà ghjè Arthur u Presidente”, ciò ch’hà sturdulitu un pocu. Infatti quellu Arthur era u Vicepresidente di i Stati Uniti, ma dinò u capimachja di a fazzione di i Stalwarts, ch’avia persu l’investitura contr’à Garfield, ma avia accittatu di divintà u so secondu. Qualcunu s’hè quantunque dumandatu sè l’assassinu ùn era statu manipulatu da quella fazzione per chì Arthur divintessi Presidente...

Eppuru quellu dubbitu hè prestu svanitu. Guiteau hè andatu in prucessu – unu di i prucessi i più famosi di u seculu – è hà compiu impiccatu. Ma Garfield, ellu, hà campatu un veru calvariu. Era cuscente è l’anu ancu turnatu à a Casa Bianca, ma i duttori ùn riescianu à truvà una balla in u so corpu, è l’infezzione s’hè sviluppata durante più di dui mesi, sin’à a so morte u 19 di sittembre... D’altronde, parechji anu accertatu ch’ella hè stata l’incumpetenza di i so duttori ch’hà tombu u Presidente, più cà e balle di Guiteau.

Di sicuru ch’ella pare da veru una gattivissima morte... ma u Presidente Garfield ùn hà quantunque persu à tutti i livelli. Ellu vulia cambià a pratica di u spoils system, cunsacrata à a fine di l’anni 1820, è chì cunsistia à ùn avè cà ghjente di u so partitu ind’è l’amministrazione. Attenti, ùn si trattava d’ùn piglià cà i soii; si trattava di mandà via ancu à quelli chì c’eranu digià per pudè piglià i soii, ciò ch’ùn hà nunda à chì vede cù a cuncezzione auropeana di a funzione publica. D’altronde a spressione saria stata ispirata da una cacciata di un senatore: “e spoglie appartenenu à quellu chì vince”.

Hè cusì ch’avè a carta di u partitu à u putere pudia esse una cundizione indispinsevule per pratende avè un postu, è ch’in certi servizii l’integralità di l’agenti era cambiata in casu d’alternanza pulitica. Eccu per quelli chì crederianu chì u clientelismu hè una spezialità mediterranea...

Ssu sistema quì ùn hè sparitu in tuttu, ma a tragedia di Garfield hà quantunque incuragitu l’Americani à cambià qualcosa, ciò chì fù chjamatu simplicemente “a Riforma”. Di ghjennaghju 1883, fù aduttata a lege Pendleton di riforma di a funzione publica, ind’è era scrittu chì “postu ch’ellu si tratta di funzione publica, nissunu pò esse ubligatu à cuntribuisce à un finanziamentu puliticu, o à rende qualsiasi serviziu puliticu, è nissunu puderà esse rinviatu oppuru svantaghjatu per avè ricusatu”. Hè vera chì à l’epica solu 10% di l’agenti publichi avianu quellu statutu novu è prutettore, ma ùn s’hè compia cusì a storia di a meritucrazia in America. Ne riparleremu.