A Piazzetta, blog in lingua corsa - blog en langue corse / apiazzetta.com informations, actualité of corsica
ATTUALITÀ CORSA FUTBOL BETTUNIZEMU MAGAGNA CULTURA SUCETÀ VIDEO GIURNALE CUMU SI DICE... CUNTATTU / PUBBA
Accueil
Envoyer à un ami
Version imprimable
Partager

Esse, o ùn esse per l'ACA

A cullata di l'ACA in L1 rilancia a rivalità Bastia contr'à Aiacciu, è dà i sudori tutte e mani à l'animatori di u forum di RCFM.



E duie mascotte si preparanu.
E duie mascotte si preparanu.
Aiacciu in prima divisione, tuttu u mondu ne parla, sopr'à tuttu quelli chì sò contru. Mentre chì i partigiani turchini è i rossi si tazzanu tutte e mane nant'à RCFM, à noi ci accusanu d'ùn parlà mai di l'ACA. Allora avemu decisu di riflette nant'à sta rivalità. Eccu dunque e 10 ragioni d'esse contr'à l'ACA... è e 10 ragioni d'esse per l'ACA.

Perchè ci vole à esse contr'à l'ACA ?
- Perchè semu Corsi è ch'ellu ci vole à tazzacci trà di noi pè rispettà e tradizione di i nostri antichi.
- Perchè ci vole à biscà.
- Perchè l'unica squadra corsa, hè u Sporting.
- Perchè c'era di più mondu in Fréjus pè a cullata di Bastia in L2 ch'è in Nîmes pè quella di l'ACA in L1.
- Perchè chì ancu Tino Rossi era per u Sporting.
- Perchè ci vole à esse sulidarii di i poveri giurnalisti di Corse-Matin chì si facenu minaccià per ch'elli parlinu appena di l'ACA.
- Perchè chì l'ultimu grande ghjucadore chì hà purtatu a maglia rossa è bianca era Marius Trésor à a prestoria, per divvi.
- Per Walter Guglielmone, Juan Esnaider è Thomas Sowunmi.
- Perchè chì ùn ci sò mai stati orsi in Corsica.
- Perchè Jean-Luc Reichmann.

Perchè ci vole à esse per l'ACA ?
- Perchè chì ci vole à esse per u solu club corsu in L1. Ancu s'ellu ùn hè micca corsu.
- Perchè ùn ci vole micca à biscà.
- Nunda ch'è pè fà cacà à Thiriez è à tutti i porchi futtuti di a FFF è di a LFP.
- Perchè Timizzolu hè l'unicu locu di u mondu induve si pò sente L'Ajaccienne. Iè, a prova.
- Perchè l'ACA hà bisognu di sustenitori per empie u so stadiu chì hè appena viotu.
- Perchè ci vole à esse curagiosu per sustene una squadra in una cità induve a magiorità sò contr'à elli.
- Perchè chì s'è no semu contr'à d'altri Corsi, ùn ci ne surteremu mai. D'altronde ùn ci ne surteremu mai.
- Perchè hè megliu à ghjucà un derby ch'è contr'à Châteauroux, Sedan è Evian-Thonon-Gérard.
- Perchè chì dui clubs corsi in L1 feranu ancu più biscà ch'è un club corsu in L1...
- Perchè Alain Orsoni.
- Perchè a L1, hè megliu ch'è a L2 : Dijon, Evian, Nancy, Brest, Valenciennes, Caen, Lorient...

Qualcosa da aghjustà ? Cappiate i vostri cummenti è insulte.



u 2ndu di Ghjugnu 2011



1.mandatu da picciaghjolu u 02/06/2011 13:15
Eiu socu per l'ACA...

mà quand'elli sò daretu à u sporting è u gazelec !

2.mandatu da KÜG u 02/06/2011 13:24
ùn esse.

3.mandatu da balaccinu u 02/06/2011 15:08
Quantunque ci hè qualcosa ch'un ghjunghju à capì. Mi ricordu d'un'epica antica (6 o 7 anni fà), c'eranu dui club corsi in L1 è tuttu u mondu era felice. Si macagnava pè i derbi mà aghju vistu ghjuvanotti à mezu i sustenadori aiaccini piglià pattoni parchì ghjastimavanu à u sporting. Oghje s'insulta nant'à i fori, si ghjasteme nant'à l'onda è ancu si tazza à l'ultimu derbi in timizzolu. Pechju di cio ch'aghju intesu, per u "match" di a squadra corsa contra a bulgaria ci hè statu un "kop" aiaccinu (aca, gfcoa!!!) è unu bastiacciu. Certi dicenu chi vene dà affari detta pà sustenadori aiaccini in dijon o di una pretesa manifestazione in aiacciu pè a falata di u scb chi nimu un hà vista. Mà pensu chi quesse so cunnerie pà ghjustificà un odiu ch'un hà m'anc'una raggione storica d'essistà. Cosa hè passatu?

4.mandatu da ANTO u 02/06/2011 16:16
u ballò basta !
http://blog-anto.be

5.mandatu da Bernardu PARDO.... u 02/06/2011 17:33
Sustenimu tutti à l'Om,quessi si chi so una vera squadra è un veru publicu...

6.mandatu da penalty u 03/06/2011 09:01
facenu cume i pinzuti , si cumportanu cume sustenitori pinzuti , si tratanu di tuttu cume i pinzuti , s'insultanu cume i pinzuti, parlanu pinzutu. A ci hanu infrugnata ancu in'u ballò. Induvinate induve u li metterebbe eiu u ballò

7.mandatu da Pumata u 03/06/2011 11:00
Pe memoria, l'annu scorsu in fine di staggione u sporting falla in aiacciu ultimu di u campiunatu ind'una situazione critica l'Aca ùn avianu piu nunda a ghjuga ne a vince! Annu ricusatu di lascia a partita ma in piu di que annu fattu u macciu di a so vita pe affunda u sporting! Si dice chi un club hé fattu da i so sustenitori induve so l'aiaccini ùn ponu mancu empie u so statu pe a cullata e a sapete perche? Perche a maggiurita di l'aiaccini supportanu squadre francese e facenu ancu i maligni in timizolu contru a l'Aca. Di sicuru i pinzutelli rossi e bianchi ùn annu mai postu un prublemu a a FFF e Thiriez serria bellu cuntentu di rimpiezza e manse accanite di u sporting cun quellle di l'Aca! Vi dumanderete cumu stu club sanza publicu si ne sorte? Sempre prisenti indi curridori a ruspa u pocu di soldi ch'ellu c'hé a piglia e a licca u cullu di a liga, ognunu cumbate incu e so arme! Persunalita aiaccine: Napuleo, Tino Rossi, l'Aca Supranaccie: P Paoli, Carlu Rocchi u SCB!

8.mandatu da KÜG u 03/06/2011 13:15
O Pumata, più schjette parolle ùn si ponu di. Ci faci sunnià !

9.mandatu da Orsu in calzetta u 03/06/2011 18:32
attenti attenti , chi Orsoni , cerca a avè, pà l'annu prossimu in L1 , una squadra cù pareghji ghjucadori corsi !
ci ne serà piu ch'in Bastia ....;-)

10.mandatu da Claudiu Pueli u 03/06/2011 19:27
Per risponde à quelli chi parlanu di u cumpurtamentu "male" di certi sustenidori perchè si tratanu trà elli, quessa hè sempre stata. E ancu, à u principiu di u ballò in Corsica è in u seculu passatu, era bè peghju chè oghje è cazzutate ci n'era in assai partite ! Oghje ùn hà nunda à chi vede à innanzu, allora quelli chi s'offuscanu... ripasarete.

@Orsu in calzetta: aspittemu di vede per i "pareghji ghjucadori corsi", è po ùn hè micca l'origine ch'importa ma a mentalità.

11.mandatu da pomudoru u 04/06/2011 17:35
a pumata hè bona in salata cù u granone , i tappani, l'ove bullite è ùn sò chè. Per turnà à l'affare chì mi pare seriu, à mè mi piace u ballò, è in prima u sporting. Ma quandu una squatra corsa a si face valè, ch'ella sia suttanaccia o supranaccia, mi face propiu piacè. CH'ellu campi u sporting è fanne altr'è tantu.

12.mandatu da Corciuaellu u 05/06/2011 02:11
Ie una Squadra Corsa!!! simu tutti d'accunsentu nantu a que mi pare...

13.mandatu da Ceccè Lanfranchi u 08/06/2011 11:32
À mè, mi dispiacini monda issi pusiziunamenta troppu partisgiani : avè una prifirenza par una di i squadri, hè logica è lighjittima. Andà à sustena una squadra frusteri contru à una squadra corsa, inveci, hè un attu chì ùn hà nisciuna scusa, è chì ùn si pò mancu à pena piattà daretu à u neci di a macagna.

Piccatu dinò chì, à spissu, a macagna sighi mascara è scusa par avvià, di manera più "dulci", idei chì sò beddi arradicati ; hè faciuli cussì : si trattani l'aghjenti di conni, è s'idd'ùn sò micca cuntenti, ci hè subitu a scusa : "Aiò, hè una macagna !!". Beddu cumpurtamentu, à veru...

Infini, vurria ramintà chì a Corsica ùn si trova micca sclusivamenti da una parti o l'altra di a foci di Vizzavona ! Sè no' cuntinuvemu à viaghjà cusì, ùn avanzaremu tantu... Piccatu !

14.mandatu da Quale hè corsu ? u 08/06/2011 13:00
"- Perchè chì ci vole à esse per u solu club corsu in L1. Ancu s'ellu ùn hè micca corsu."

Bella, a macagna... Site tutti sicuri di a vostra genealogia, o quelli di a piazzetta ? Sicuri ????

15.mandatu da domeneccu u 08/06/2011 23:39
O Ceccè, i Corsi sò cum'è tutti l'altri, nè megliu, nè peghju... qui dinù, cum'e in Italia o in Spagna, u campanilisimu è u "chauvinisme" so forti

Semu latini, hè cusi... ùn ci hè statu viulenza, ùn ci hè statu morti, chi ci hè statu di male, in fine di contu?

i bastiacci biscanu è si credenu u centru di u mondu è vedenu l'aiaccini cume pinzuti

l'aiaccini si credenu superiori è fini è trattanu i bastiacci di "paysans"

Ma ogni bastiacciu hà famiglia o amichi in aiacciu (e vice versa)... à u finale, no ùn avanzemu micca, ma ùn dramatizemu micca non più !

16.mandatu da Grossu panzutu u 09/06/2011 01:26
A Corsica hé fatta a scalle a chi colla a chi falla... Ma quandu collanu tutti ghje a cunfunsione!!!

17.mandatu da Ceccè Lanfranchi u 10/06/2011 09:06
Salutendu vi à tutti, è senza po' vulè entra in un chjam'è rispondi cù l'amicu Domeneccu, ùn mi pari micca di dramatizà quand'e' vicu ghjovani corsi ( è pratesi di "spiritu naziunali" ) sustena una squadra frusteri ( Marseglia o altra ) pur' d'ùn sustena una squadra corsa ch'ùn hè dirittamenti a soia. È m'hè difficiuli di veda quì un "campanilismu latinu". Avali, sè qualchissia ci ghjunghji à spiicà mi chì u campanili di "notre dame de la Garde" hè più vicinu da no' chè quiddu di "u Domu" o di "San'Ghjuvà", tantu meddu... Ma tandu, ci vurrà dinò à accittà di ribattizà "A Piazzetta" in "La Placette, putaing, cong !"

Novu cumentu :
Seguitateci nant'à Facebook
L'articuli
Abbunatevi à a newsletter
Circà nant'à A Piazzetta
Ricerca avanzata
Galleria
A maledizzione di e buatte corse
A maledizzione di e buatte corse
1981 : a cuppa hè nostra !
1981 : a cuppa hè nostra !
Ponte Leccia city
Ponte Leccia city