E newtizie settimanale: Sabbatu u 12 di lugliu 2008
Un elicotteru per a droga è un antru per u prifettu!
Si parla assai d'elicotteri in Corsica. Cumu serà ch'elli saranu sempre ficcati in i culpacci? À quandu trasportanu a droga, à quandu sò à giru per u prifettu è tricanu à salvà una zitella...
Nepita connection
È si riparla di a droga. 17 personne arrestate è piantazione di cannabis trove ind'è parechji traficanti. Soca, a nepita, ùn averanu mai pruvatu à fumà la...
Baccalà per Corsica!
Sò cascati i risultati di u baccu. S'è quasi ognunu l'hà avutu, cum'è ind'è l'école des fans di Jacques Martin, ci vole à salutà quantunque à una bastiaccia, Marie Mouriès. Incù una media di 20, l'hà impalaficcati à tutti! È quale simu? "Simu capre chì femu umbeh"???
Ballemu a Tettonica
A Corsica oghjinca hè in cima di u prugressu.Simu "tendanse". Ùn mi cridite? Andate puru in Bunifaziu induve i giovani russignoli amparanu à ballà a tecktonik. Aiò, venite cù mè !
Mafiosa, in live !
Fermanu duie tradizioni quantunque. E più pessime bella sicura! 2 omi anu tombu a so moglia. Pane è pernice, affari di casa, ùn si ne dice. Listessa per a squadra di a Brise de mer o l'amichi di Jean-Jé Colonna. A pulizza conta i morti. Unu à tè, unu à mè... Aspettemu tutti a fine di stu filmacciu di l'estate per sapè quale serà u prussimu rè di Corsica? Pudete vutà mandendu ci un SMS à 3€99. Scrivite 1, per a Brise de Mer, 2 per i suttanacci, 3 per a mafia Russa, è 4 per un antru gruppu.
À u museu o à a morga?
Infine, e lingue saranu forse ricunisciute in a custituzione. I diputati anu vutatu un amendamentu novu, à l'articulu 75... Mentre i senatori avianu mandatu e lingue da u museu à a morga, u corsu torna in u "patrimoniu naziunale di a Francia". Quantu custerà u ticchettu di u museu?
Per sta simana, femu la finita. Bastarà, chè?
A Corsica dice à vedeci à Edmond
