Da induve vene u nome di u "Cirque de la Solitude" ?

Ùn si dicerà mai abbastanza quantu e cundizione ponu scambià in furia in muntagna è quantu ci vole à esse prudenti. Di ghjugnu, u terribile sfundamentu di terrenu chì si n'hè purtatu sette persone hà messu à palesu quantu ùn si face attenzione à e cundizione meteorològiche.

A moda di a corsa, è di duppià e tappe di u GR 20 ùn arrangia nunda. Di regula, hè megliu à ùn esse à caminà u dopu meziornu, quand'elli schjattanu i tempurali.

L'accidente di st'estate hà messu à palesu nomi cunnisciuti da i passiunati di muntagna, ma forse micca da u grande publicu è... assai goffi.

Avà tuttu ognunu cunnosce u "Cirque de la solitude" è di u "Col Perdu", di u so nome corsu I Cascittoni è a Bocca Tumasginesca.

Ma da induve venenu ?

Trà Ascu è Niolu, hè u locu riputatu u più tennicu è u più difficiule di u GR20. Hè capita, chì a strada d'alta muntagna passa per stu locu salvaticu, bellissimu, inchjuzzatu, minerale, fattu di pentoni chì falanu à l'asseccu.

Ma ben ch'è salvaticu, u Cirque de la Solitude era cunnisciutu da l'omi. I pastori aschesi chì u frequentavanu. È l'anu chjamatu I Cascittoni.

Da u latu di U Mansu, a ghjente u chjama "E Mute" (infurmazione data da u CESIT, Cumitatu d’Istudii Scientìfichi è Infurmàtichi di a Tupunimìa di a Corsica).

Situatu in cima di a stazione d'Ascu, sopr'à I Cascittoni truvemu dunque u Col Perdu, chì ùn avia nunda di "persu" postu ch'ellu era cunnisciutu sott'à u nome di Bocca Tumasginesca.

Avà l'IGN dà a doppia numinazione per certi lochi, ma sempre cù u sbaliu ("Cascettoni" invece di "Cascittoni").

Di fatti, a muntagna corsa hè piena di nomi sfrancizati :

Sempre nant'à a cummuna d'Ascu è sott'à u Cintu, ci truverete a Tour Penchée. Ma chì u so nome corsu ? Averà esistitu, ma s'hè persu.

Listessu pè a Pointe des Eboulis, vicina di u Cintu. Averà avutu un nome quessa ? Micca sigura, hè di più una cresta ch'è una punta veramente identificata. S'ella avia un nome, s'hè persu.

Sempre in u massicciu di u Cintu, vicinu di a cima di u Paglia Orba ci hè a Combe des Chèvres. Custì dinù, stu locu averà avutu un nome corsu ?

S'ella vi piace, puderete circà di fà u Pic Von Cube (2 247 m). Ma preferite forse u nome di Punta Rossa. Ella hè stata sbattizata cusì da u cunsigliu municipale d'Ascu in u 1961.

Félix Von Cube hè cunsideratu cum'è u piuneru di l'alpinisimu in Corsica. À a fine di u XIXu - principiu XXu, stu tedescu hà fattu parechji sughjorni in u massicciu di u Cintu. Li duvimu una descrizzione precisa di e muntagne corse è una cartugrafia impurtante. Hè ellu chì hà apertu è fattu cunnosce parechje vie d'appichjera (vi và cum'è parolla per "escalade" ?)

Oghje, nant'à e carte di l'IGN truvemu i dui nomi : "Punta Rossa ou Pic Von Cube".

Hè impurtante di rende omagiu à stu scentificu chì hà fattu per a cunniscenza di a muntagna corsa. Ma sin'à sbattizà un nome anticu d'una muntagna ?

Quessu si trova in u massicciu di Bavedda. U Trou de la Bombe currisponde in veru à... U Tafonu di u Cumpuleddu. U nome vene da "compulu", termine di pastore chì indetta un accintu per l'animali.

Nomi turisticu vs. nome di a tradizione pasturale, quale hè chì hà da vince ?

Quelli chì sortenu in muntagna truveranu nant'à i guidi tanti è carte IGN :

"Pointe Lejosne"
"La Grande Barrière"
"Les Grands Mulets"
"Le Pas de la Bergère"
"La Cafetière"
"Col Triple"
"Aiguille Paris-Chamonix"
"Le sous-marin de poche"
"Tour St-Etienne"
"La Brêche du Sphynx"
"La Marmotte"...

Circate bè, ne truverete centinaie cusì.

In a so Note d’orientation sur la question de la toponymie corse, scrive Stella Retali-Medori :

La présence de formes françaises voire étrangères sur ces cartes n’est pas liée nécessairement à l’urbanisation mais aussi au tourisme, notamment de montagne.

L'alpinisti fresteri principianu à interessassi à e muntagne corse à a fine di u seculu XIX. I primi sò inglesi : Freshfield, Tuckett. I fratelli Finch è u nurvegianu Bryn aprenu a "via Finch" in u Paglia Orba in u 1909.

Da vede stu filmu :

D'altri alpinisti sguizzeri, alemani (Von Cube), francesi (u scentificu Hellbroner) seguiteghjanu.

Ma hè sopr'à tuttu dop'à a segonda guerra mundiale chì l'alpinisimu si sviluppa in Corsica. E muntagne aschese è niulinche vedenu scalà di più in più ghjente, u turìsimu cresce, a cunniscenza di i massicci corsi si sparghje :

U 1971 hè l'annu d'un cambiamentu maiò : u Parcu Naturale hè creatu, cù u so GR20 è i so rifugi d'alta muntagna chì facenu cresce a frequentazione di i massicci corsi.

L'artigianu di u GR 20 si chjama Michel Fabrikant (1912-1989). Hè un tercanu di a muntagna chì s'hè lanciatu in a splurazione in detagli d'ogni muntagna corsa. Face a descrizzione di tutti l'accessi, tutti i viòttuli, tutti i stazzi è agrotti induv'ellu si pò dorme, da u Cintu à l'Alcudina.

In u 1971 esce u so "Guide des montagnes corses", in dui vulumi. Diventa a bibbia di tutti i passiunati di muntagna.

Stu libru permette à i passiunati, Corsi è fresteri, d'avè accessu à un mondu frequentatu da poca ghjente. A cunniscenza di a muntagna corsa deve assai à Fabrikant.

L'alpinistu và à vede quelli chì sanu, pastori è cacciadori. Interrugheghja, dumanda i nomi di lochi, s'interessa à a tupunimia. Certe volte cerca ancu di spiegalla...

Quand'ellu ùn ne trova micca... inventa un nome novu. È hè cusì chì i chjassi di muntagna sò pieni di nomi francesi. Tutti averanu avutu un nome corsu ? Micca sigura.

Ma certe volte ancu, sbatteza i nomi. Hè cusì chì "Col Perdu" rimpiazza à "Bocca Tumasginesca", "Le Cirque de la Solitude" caccia u nome di "I Cascittoni", u "Col Triple" quellu di "Bocca à e Sponde"...

L'IGN ripiglia u so travagliu, sti nomi si ritrovanu nant'à e carte, i libri... U male hè fattu.

Ma ùn vale a pena di mette tuttu in colpa à l'altri è à i fresteri. Oghje, nunda impedisce i cunsigli municipali d'impone u cambiamentu di nomi di lochi. Per quessa, basta d'un cunsigliu municipale.

Ch'aspettanu i Corsi per dumandalla ?