Assassinii : và bè, ci hè peghju chè a Corsica

Chì piacè d'annunziavvi sta nutizia : nò, a Corsica ùn hè micca a regione di u mondu induv'ellu si tomba u più !

U situ Slate hà fattu a so inchiesta partendu da un tweet chì dicia chì :

"Les 100 Corses tués en 5 ans pour 300000 habitants, c'est la même proportion que les 50000 assassinés en 6 ans au Mexique"

Ùn v'inchietate, era una cunneria. Slate s'appoghja nant'à un raportu di l'ONU (si pò caricà u PDF) è ci spiega chì in Corsica avemu una media di 7 assassinii à l'annu pè 100.000 abitanti.

À u Messicu, s'arregistreghja 16,5 assassinii à l'annu pè 100.000 abitanti.

Tuttu và bè dunque !

Pè l'annu 2011, i paesi i più periculosi sò u Honduras (92 assassinii pè 100.000 abitanti) è u Salvador (69 assassinii pè 100.000 abitanti). Sò belli in davant'à noi ! In più di quessa, ci mancanu i sciffri pè parechji paesi africani.

Bon d'accordu simu i peghju d'Auropa (iè ancu in Albania si tomba menu, 4 assassinii pè 100.000 abitanti solu !).

Ma si pò apparagunà a Corsica à a criminalità di paesi cumplettamente rispettabili è muderni cum'è Haiti è u Timor Orientale (6,9 assassinii). U Pakistan (7,6 assassinii), u Mozambique è u Kazakhstan (8,8) sò vicini.

Quand'è no vi diciamu dunque chì tuttu andava bè !