Aiutemu i maffiuselli corsi

Nanzu, quandu andavate à vede un macciu in Furiani sapiate ch'è vo ingrassavate a panza di certi dirigenti, ma ùn era micca ufficiale.

Quantu scrucconi anu prufittatu di u Sporting per cumprassi case, 4x4 è jet-ski ? Tutte e tendenze pulìtiche sò state rapresentate in sta manghjeria generale dapoi 40 anni.

Oghje, l'affari sò ancu più sèmplici. Di soldi da manghjà, ci n'hè pochi in terza divisione. E casce sò viote, i sponsor sò rari.

Allora, u megliu era di braccà direttamente a biglietteria una sera di macciu. A perfurmenza hè stata realizata marti sera durante a partita Bastia - Fréjus.

Un omu in mottò hè venutu à piglià a ricetta à e casce. Puderà almenu cumprassi una vesta nova Millet, mettesi qualchì buttiglia in buatta è fassi qualchì ragliu di coke.

Quandu vi diciamu chì a realità corsa hè peghju ch'è a fizzione ! Quessu, mancu i scenaristi di "Mafiosa" l'avianu trova... "Et qui on est ?"

À forza di tichjassi di Scarface, di Mesrine è di cuccaina, ne pudemu esse siguri : a Corsica avanza da veru.