A playlista di Pasquale Paoli

Casata : Paoli. Nome : Antone Filippu Pasquale. Età : 29 anni. Prufessione : Capigenerale di a Nazione Corsa.

Era u 14 lugliu 1755 (ma quessa avà a sapete).

È cumu ùn ci hè nunda di megliu ch'è appena di musica pè rendeli omagiu, eccu a playlista di tonton Pasquale.

Canta u Populu Corsu - A Palatina

A Palatina (o Pasqualina) ùn si sà nè u nome di quellu(a) chì l'hà scritta, nè u nome di quellu(a) chì l'hà cumposta. Parechji gruppi l'anu cantata nanz'à Canta u Populu Corsu, ma nunda di megliu ch'è l'interpretazione di Natale Luciani, Ghjuvanpaulu Poletti è Ceccè Buteau una sera in Arghjusta Muricciu à u principiu di l'anni 80

Per lu Capu Naziunale
Appruntate li truffei
I furdani à sei à sei
Anderanu à tumbulà
È dumane à lu Cunventu
U vulemu incurunà.

L'Arcusgi - L'Arcusgi di Pasquale

Aspettendu a rivincita di Ponte Novu...

U sonu di u culombu introna la Custera
Ci chjama lu ribombu sott’à a cara bandera
Vicinu hè lu nemicu per piglià la Nazione
A retita di l’anticu ci dà mille ragione

I Chjami Aghjalesi - Borgu

Ci hè statu Ponte Novu, ma nanzu, ci hè statu a concia di U Borgu.

Un generale fù mandatu quì
In Bastia pè tumbà è ferì
Stu conte scemu chì vulia fà
Dumà lu populu di Pasquà.

U Culombu

Cumpostu da Petru Rocca in u 1937, successu di l'anni 70. Custì cantatu da Canta u Populu Corsu.

"Disceta la speranza
A voce di culombu
Chjama di u so ribombu
A santa Libertà"

Diana di l'Alba - A concia di Luigi Piombu

In l'ultimu dischettu di Diana di l'Alba.

"Mai mai nisun statu
Ci hà fattu ghjimbà lu capu
Mai mai nisun statu
Ci ferà ghjimbà lu capu !"

Pigliati què, o Valls.

I Campagnoli - Omi di a storia

"Ma di quella storia,
Ùn si, ùn si ne sente" canta u gruppu.

È ci n'hè chì ùn volenu sempre micca sentene parlà.

Diana di l'Alba - 1769

Ah ! Sì Pasquale ùn avia messu in postu i mercenarii tedeschi nant'à quellu ponte...

I Chjami Aghjalesi - Guerrieri

Bon d'accordu, ùn ci hè nisuna menzione à Pasquale Paoli in sta canzona. Ma ùn face nunda.

"Fissanu un puntu luntanu, a vittoria chì s'avvicina
U nemicu soffrerà sterperanu u so locu
Pè di qual'hè u maestru, diceranu cù u focu
Fissanu un puntu luntanu, a vittoria chì s'avvicina."

I Voci di a Gravona - Circinellu

Dumenicu Leca di Guagnu dettu Circinellu, era un prete paulistu accanitu è animatore di a resistenza in a pieve di Vicu, dop'à Ponte Novu. Hà ghjuratu d'ùn rendesi micca à i Francesi, è hà tenutu a so prumessa.

Anch'ellu si merita u so picculu omagiu nant'à sta pagina, nò ?

Canta u Populu Corsu - Corsica Nostra

"Parla di Paoli, di i so guerrieri
Sopra à le cime è le fruntiere
Di Ponte Novu canta la gloria
Ci porta à l'arme, ci porta à more

Corsica nostra, terra d'eroe,
Rizzati libera, falla per noi,
Portanu u nome di libertà,
I to figlioli pronti à marchjà,
Portanu u nome di libertà
I to figlioli pronti à luttà"

Ghjuvanpaulu Poletti hè un tippone.