A Corsica vista da u pittore Turner

Nanz’ à i turisti, in Corsica, venianu viaghjatori. Eranu pochi è spessu animati da un certa mistica. Perchè tandu, ùn era manc’appena faciule di ghjunghje sin’à noi, è a Corsica si pò dì ch’ella si meritava... Tra sti viaghjatori chì ci tenianu tantu à cunnosce sta terra è a so ghjente, pudemu rammintà assai artisti, pueti è idealisti di prima trinca bramosi di scopre è d’arrichiscesi a mente.

Oghje, vi parleraghju di Turner. No, micca Tina. Nè u so tippu Ike. Ma Joseph Mallord William Turner, quellu pittore è intagliadore inglese di u XIX esimu seculu.

Bon, s'è no cummincemu cun ellu, ghjè chì dapoi dui mesi, u famosu museu di Londra, a Tate Britain ha apertu una mostra tamanta nant’à ellu è si ne parla da per tuttu.

Capitemi bè, ùn si tratta (micca solu) di fà a mo snoba… Va bè chì sta mostra ghjè un must see, ma Turner ghjè quantunque un veru geniu chì hà datu assai a storia di l’arte è di a sensibilità. E cù u tempu ch’avemu in Corsica sti pochi ghjorni, casca bè di parlà ne.

Perchè u so stile, si ricunnosce di siguru : timpesta, nebbia, celi stigliulati, attracchjata… T’hà un raportu assai soiu à u lume, à l’elementi è à a percezzione in generale chì sarà ripigliatu pocu dopu da i pittori di l’Impressiunisimu.

Vale à dì chì u tippu, ùn cerca micca di rapresentà cù fedeltà ciò ch’ellu vede ma prova piuttostu di sprime ciò chì sti paisaghji li facenu sente, u so statu d’anima, a so debulezza… À st’epica, a funzione di l’arte hè in traccia di cambià, è Turner ghjè unu di quelli chì s’alluntananu sempre di più di u mimetisimu.

Pè dilla in furia, Turner currisponde propiu bè à u sterotippu di u brittanicu appena eccentricu, pienu di malincunia graziosa. Ghjè forse per quessa chì li piacia tantu à viaghjà solu solu attraversu l’Auropa, in paesi eccentrichi anch’elli, vale à di « fora di u centru »…

Ecculu dunque ghjuntu in Corsica :

1828, Corsica (in Vicu ?) :

In 1830, o trà 1830 è 1835 Corsica :

Hè vera chì a Corsica si ricunnosce pocu in sti quadri. Ma a ragione si capisce bè : ùn hè micca ella u sugettu di st’opere. Ciò chì Turner vole pitturà, ghjè ciò chì a Corsica li facia nasce in mente. È s’ellu hè ghjuntu parechje volte in Corsica, ghjera ghjustu appuntu pè risente nove sensazioni, o pè apprufundisce a so percezzione ; pè esse mossu è cummossu.

È oghje simu noi chì pudemu moveci è cummoveci cù sti quadri... S’ellu ùn vi basta micca di fidighjà i quadri nant’à internet, a mostra Late Turner in Londra dura sin’à u 25 di ghjennaghju 2015.

Eppo i quadri di Turner, i pudete vede fora di a mostra, sempre à a Tate Britain. È sì vi site passiunatu pè stu bravu Joseph Mallord William, ci hè ancu un filmu di Mike Leigh :

Da vede : u situ di a Tate Britain