21 ragioni di preferisce L'Isula Rossa à u restu di u mondu

« L'isula sarà u patibulu chì impiccarà à Calvi ». Secondu à a legenda, cusì disse Pasquale Paoli quand’ellu fundò à L'isula, (scritta dinù Lisula Rossa, detta L’Île Rousse in francese). Hè vera chì a cità Paolina (chì si sparte stu titulu incù Corti, anziana capitale) hè rivale dipoi sempre di Calvi, a vicina genuvese. I terreni induve hè stata custruita appartenianu à u paese di Santa Reparata di Balagna, chì ne hà fattu u rigalu à Paoli per fà stu portu oghje famosu. À l’epica e marine valianu pocu affare. Hè dinù l’una di e più belle cità corse, incù assai lochi scunnisciuti, da scopre o da turnà à scopre.

Fundata dunque in u 1758 da u Babbu di a Patria, tuttu o guasi ind’è a cità ramenta a paternità di u Generale. È di sicuru, a piazza centrale tene u nome di u fundatore.

Ma in L'Isula Rossa, di chì "isula" si tratta ? L'orìgine di u nome di a cità vene da l'isulotti chì si ponu vede.

È tandu, vi venenu in capu e parolle di a canzona cantata da Carlu Rocchi :

"L'Isula Rossa, tu n'es qu'un petit rocher
Mais tu as pour te baigner
La Méditerranée..."

Bon ok sortu.

Ma cumminciemu incù u centru, u « puntu zeru » di a cità, ciò chì i Lisulani chjamanu « Les Quatre Becs » : issa statula di u Babbu incù quattru bocche di lione assiccate, anziana funtana, incù quattru palmi altissimi à l’intornu.

À manu manca, si trova una di e più belle ghjesgie di a cità. Quella di l’Immaculata Cuncezzione, custrutta in u 1892. Distrutta à principiu di a guerra di u 14, hè stata rifatta ind’è l’annate 30. Hè quella di i matrimonii, di l’intarri, di e feste. Davanti, parechji palmi, chì, incù i platani, sò l’arburi i più presenti in centru di a cità.

In fondu di a piazza truvemu u cunventu di e Sore di Maria. S’è oghje si ne và appena à caternu, custruitu in 1849 nant’à u terrenu di i Sgiò Piccioni, stu locu hè carcu di storia.

Fù un cunventu, un edifiziu publicu, una scola pè e zitelle disgraziate ma dinù… un attellu induve si tessava a setula. Dopu à parechji anni di squat, oghje un prugettu di riabilitazione hè in corsu

Chjamatu ancu Castellu Piccioni. Hè u più grande edifiziu, u più bellu dinù, u più maestosu di a cità. Annant’à a Piazza Paoli, piattatu daretu à una grande corte classata à l’inventariu generale di u patrimoniu culturale, tuttu rusulinu s’alza iss’ottellu famosu, carcu di storia. In u 1837, a famiglia Piccioni avia pigliatu a decisione di fassi una residenza sicundaria. Eccu dunque arrittu stu castellu in piena cità, chì raprisentava a putenza di quella famiglia. Ma in u 1929 fù vindutu à una sucetà mundiale d’ottelli chì appartenia à Luigi Altieri.
A clientela di quellu albergu era prestigiosa quant’è u locu : U principe di Gallia, u Rè di Grecia, ma dinù u Rè di u Maroccu Mohamed V chì, in esiliu, l’avia privatizatu incù tutta a so corte mentre sei mesi trà 1953 è 1954. Chì tanti AirBnB !

"Marinella, oh reste encore dans mes bras...", cantava l’Aiaccinu Tino Rossi. Sta Marinella, ùn la cunniscimu, ma quella di L'isula ella, hè tracunnisciuta. Hè u nome di sta pruminata chì và da u molu sin’à Carrucchettu, longa d’à pocu pressu un chilometru, và longu à u mare in pienu centru di a cità. Custì, i zitelli correnu, i parenti puttachjanu. D’inguernu quandu u mediterraniu è u libecciu si scatineghjanu, i culori è l’aria salita si mischjanu in una zerga terribule, è i marosuli pichjanu forte contr’à a Marinella. Cuntrastu incù l’estate, induve i pumataghji ci si facenu dui passi à l’attrachjata, curnettu di ghjacciu in manu, in pace.

L'isula hè una cità di piscadori. U molu, rifattu poc’anni fà, ne hè unu di i simbuli. A l’una di e stremità di a Marinella, u pudete truvà, chì punta versu u Capicorsu. Oghje, sò piuttostu i zitelli à andà à ciuttassi cum’è sciocchi quallà. Ma ferma un panorama d’eccezzione.

U mercatu cupartu di Lisula incù e so 21 culonne hè l’unu di i soli mercati cuparti di tutta a Corsica. Classificatu cum’è edifiziu storicu, fù custruttu ind’è l’annate 1850. Ci si pò truvà tutte e mane frutti, pesci, cuggiulelle è altra robba da manghjà. Ma ghjè sopr’à tuttu iss’architettura cusì speciale chì li dà tuttu u so interessu.

Tutt’ognunu cunosce a storia di e torre genuvese di Corsica. D’altronde, in L'isula cum’è in altrò, ste torre esistenu sempre, ci rivinaremu dopu. Ma parlemu avà di a torre di u Scalu, detta dinù « La tour de sel ». Nant’à a piazza di a merria, pudete truvà sta torre strana. Numarosi sò quelli chì credenu ch’ella hè una torre genuvese, ma manc’appena. Fù edificata quì à u XVIIesimu seculu da a famiglia Fabiani, chì falava da Santa Reparata, nanzu ch’ella sia imaginata a cità da Paoli. Ci si mettia u sale, à l’epica. Più tardi ci s’hè messu a polvara. Gattiva idea : in u 1778, una saetta pichjò a torre è parechje case si sfundonu à l’ingiru, fendu parechji morti. Ricustrutta tandu, fù una pulverera torna parechj’anni, nanzu di mutassi in prigiò. Ghjera appiccicata à a ghjesgia di a Cuncezzione, distrutta in u 1936, chì si pò vede nant’à certi vechji ritratti.

A vechja villa di L'isula hè una vera maraviglia. Carrughju sumerà, carrughju Paoli, carrughju Napoléon, Notre-Dame… Isse strette parallele è tutte fitte sò un cuncentratu di mediterraneità è di cursità. Ci si pò sempre truvà oghje cummerci è abitanti, vechje famiglie lisulane. Ma dinù, d’estate, assai, assai, è ancu troppu turisti.

A casa cumuna di L'Isula ghjera mentre anni è anni una caserna per i militari genuvesi, è dopu corsi, è infine francesi. S’è vo intrate nentru, pudarete truvà un’altura smisurata à ogni pianu, è una friscura incredibule ancu in piena sciappittana, colp’à a grussezza di i muri. Oghje, fora di i scagni di a municipalità, ci hè una sala culturale è parechji servizii publichi. Di pettu à u mare, l’isule è u molu, ghjè sicuramente a merria incù a più bella vista di u mondu.

A ghjesgia di a misericordia, accant’à u vechju cunventu di i Francescani, hè stata rifatta pocu tempi fà. Ghjè più discreta chè a parochja nant’à a piazza, ma assai bella.

Unicu puntu d’acqua anticu trà i muri di a vechja villa, ghjera appena l’Oasis di a cità, accant’à a casa Arena. Oghje hè famosa per a so biscutteria.

Hè unu di i simbuli di a cità. Ritrattata sott’à tutti l’anguli, ghjè un locu fora di u tempu, annant’à l’isula di a Petra.

Postu ch’è no simu nant’à l’isule, lampemu un’ochju nant’à u fanale. Micca male nò ?

Stemu appena versu quì. Chjinemuci un mumentu nant’à issu bancu (iè, perchè in Balagna ùn ci « pusemu » micca, ci chjinemu).

Ghjustu u tempu di ramintà u nome di l’ottu isulotti chì facenu l’arcipelagu di L'Isula Rossa : A Saletta, e Trè Petre, a Petra (detta dinù Isula Grande o Isula Maiò), l’Isula di u Rucciu (detta dinù « Île du Brocciu… »), Isula Piana è Ruccettu (Bruccettu).

L'isula ghjera dinù una vera cità, micca un paisolu. A pudemu ricunosce à certe di e so facciate d’edifizii magnifiche. Cum’è quì, carrughju « Notre Dame ».

Perchè L'isula ghjè a cità di e bocce. Chì tanti Bucciata Bastiaccia ! Noi avemu « l’Open Pascal Paoli ». Allora ùn ci pudemu scurdà d’ammintà tutti i lochi induve si ghjoche : a Piazza Paoli « principale », a parte davant’à a ghjesgia di l’Immaculata, accant’à u munimentu di i morti , è puru davanti à a gara.

Postu ch’è no parlemu di a gara : eccu una di e più belle di Corsica.

Ùn si pò parlà di L'Isula senza parlà di i Platani. U caffè di i Platani, stituzione storica chì hà trapassatu i seculi, hè sempre quì. Hà ancu ripigliatu a so facciata storica dop’à i travaglii fatti quest’annu !

A fiera di L'Isula hè a più vechja di Corsica. Iè, più vechja chè quella di Niolu (è toc !). Hà a particularità d'esse una di e sole à ùn esse ligata à una festa riligiosa. À Lisula, ùn si tratta chè di cummerciu ! È di festa... À cavallu dipoi u XVIIIesimu seculu nant'à agostu è sittembre, sta fiera permittia à i pastori, l'artigiani, l'agricultori, i traculini d'ogni rughjone d'adduniscesi è di vende a so robba à i Lisulani è i paisani di Balagna chì "falavanu in fiera". Bancone, canti, ripasti, partite di carte è rullette animanu e serate. Oghje ci sò ancu i giravia (i "manèges") per i zitelli, è a fiera si face d'ottobre dipoi annu, à a dumanda di i cummercianti (per ùn impedì a sacro-santa stagione di compiesi in pace). Un scambiamentu di data chì scumode certi Lisulani... ma hè sempre megliu chè Calvi On The Rocks !

Ma u megliu hè quantunque, per quelli chì ùn cunoscenu a cità, d’andà à passacci dui ghjorni per capì. Pudaranu dinù cullà à vede i paesi vicini di Munticellu, Santa Reparata è Curbara, chì sò tutti à trè magnifichi.

È sopr’à tuttu, piglià cuscenza chì sti lochi binadetti sò da tene, è da priservà. Fendu dunque casu à ùn fà n’importa chè incù u fundariu è u patrimoniu, perchè L'Isula, ghjè dinù una parte di a cità cumplettamente sacrificata, incù lotissements à palettate, aspessu goffi è vioti.