Déclaration du Conseil universitaire MAK de Tizi Ouzou en Hommage à Matoub Lounes: Mazal ṣṣut-is la yettbeɛziq

Mazal ṣṣut-is la yettbeɛziq

Matub Lwennas, d acennay aqvayli ilul deg 24 yennayer 1956 deg Tmurt n Leqvayel di Tewrirt Musa Waɛmer.
Matub ixdem aṭas ɣef tutlayt d yidles, d tmagit taqvaylit imi mačči kan d acennay am wiyiḍ, netta icennu taɣect tamḥaddit (chanson engagé). Ccna-s d inaw (discours), tizlatin-is ttakent aveḥri i turet. Anwa ara yettun Lwennas? Yak d anza-as i aɣ-d-yessawalen i aɣ-d-ijemɛen ass-a ɣer uxxam-is
Ass-agi lliɣ
azekka wissen
nniɣ-d ayen ẓriɣ
d wayen ttwaliɣ
cfut di terga ma ɣliɣ
d anzaw ara awen-d-yessiwlen

Lwennas ass-a s wayen yexdem d wayen yecna i yekcem s amezruy, d netta s timmad-is ay yuran isem-is s yiskilen n wureɣ, ccna-s yufrar akkin i tizi yeffeɣ ula ɣer tmura.
Lwennas, yezga yettweṣṣi deg yiqvayliyen ɣef tegmat gar yiqvayliyen, d tin kan ay t-iceɣven, yeẓra d tinna i d ddwa-nneɣ;
Ay adrar yis-k i nedheɣ
awi-d swav iɛerqen
mmel-iyi avrid ara mleɣ
I ccetla-k yemyegzaren
D tadukli i d lexṣaṣ-nneɣ
ɣunzan-tt akk yiqvayliyen.
Ṭuver 88 yejva-d am tlafsa, ur yezgil ḥedd deg uvrid-is. Imdanen yeṭṭsen acḥal deg tnafa dduqsen-d ɣef tikkelt. Yekker ccwal di yal tama, ula d Lwennas tegla yes-s ass n 09 deg Tuver 88 deg uvrid-is ɣer Micli anda yessawel i lehna, yemmuger-d lmut; xemsa terṣasin i ikecmen tafekka-s, si sviṭar ɣer wayeḍ, feqqren-t 17 yiverdan, rran-t-id si lmut, yebbeɛzeq-d ṣṣut-is i tikkelt niḍen;
Wwteɣ dliɣ ɣef nnif-iw
Ufiɣ wid iyi-isxewḍen
Xas yeǧǧa lǧehd iɣallen-iw
Mazal ṣṣut-is ad d-yebbeɛzaq
ad as-d-slen
zemmen 42 yiseggasen di tudert-is xas drus, yedder tudert n umɣar azemni. Deg yiwen n usefru ur yecni ara , iveggen-d belli iwala Ussan-is ur ttiɣzifen ara, yenna:
ur gganeɣ ara
ttewḥiceɣ ad d-yeɣli yiḍes
tezdeɣ-iyi lmut tirga
nnehtat, tawla
averdi-w la yi-itteqqes
tikkelt-a, ad teṣɛev tnekra
unfeɣ i lmeḥna
tudert ad tt-id-tesseɣres.
Lwennas, qemḍen-as rruḥ deg 25 yunyu 1998 deg tala Bunan, nɣan-t urd as-teččur, meɛna xas akken deg yimi-s ur fukken lehdur ar ass-a mazal yesruy leɛrur i as-iqemḍen ṣṣut. Mazal ṣṣut-is la yettbeɛziq.