Sei mesi per salvà u Sporting

Mai u Sporting ùn hè statu cusì vicinu di perde u so statutu prufessiunale è di cascà in u terribule mondu di u "National".


Digià chì a "Ligue 2 Orange" face a paura : Dijon è u so stadiu Gaston Gérard, Clermont Foot è u so stadiu Gabriel Montpied, Laval è u so Francis Le Basser...


Allora in l'infernu di u National, à mezu à Fréjus, Thonon-Gaillard, Pacy sur Eure, Luzenac, Cassis-Carnoux, Rodez, Moulins è Plabennec, un Sporting ùn puderia sopravvive.


Cun digià 5 punti di ritardu nant'à a prima squadra à ùn falà, Bastia hè più ch'è in difficultà. Ci vulerà à riesce un parcorsu di campione in e partite chì fermanu : 33 punti in 24 scontri.

À vede i macci di i lonzi chì ghjocanu cù a maglia turchina, hè un veru miràculu chì aspetta Charles Capia : cumu cambià 11 catini in 11 leoni ? Cumu fà vultà à u stadiu un publicu chì preferisce u Régent à Furiani ?


Allora ? Charles Capia ci la ferà à truvà soldi per cumprà, dirigenti per direge, intrenore per mughjà, sustenidori à mutivà, è ghjucadori à scuzzulà ?

Alè, per una volta femu a scelta di l'ottimisimu. Di tutte manere u Sporting hè un club à parte, chì ùn hà mai fattu nunda cum'è l'altri.

YES, WE CAN !