Perchè u Gazélec in L1 hà da rompe e stacche

Ma chì hè stu nome "Gazélec" ? À l'orìgine u GFCA nasce da a fusione di dui clubs aiaccini : U FCA (chjamatu "le Bistro", tuttu un prugramma...) è u Gazélec Football Club d'Ajaccio. U nome "Gazélec" hè u nome datu in generale à i i clubs di l'agenti d'EDF-GDF. Oghje per esempiu ritruvemu u Gazélec Auxerre Tennis de Table, u Gazélec Badminton Bourges, o u Le Mans Gazélec Sports.

U nome di "Gazélec" sente l'anni cinquanta, l'amatorisimu è u club pupulare, operaiu. Ritruvallu in u mondu prufessiunale hè digià un'anumalia. Tantu megliu.

Dimmula franca, u stadiu Ange Casanova di Mezavia hè un pezzu d'Albania in Corsica. Forse u stadiu u più goffu di L1 è L2 : trè tribune, nunda daretu à a gabbia d'un latu, 3000 piazze... À l'epica di i stadii muderni, di l'Euro 2016, di u "naming", di i stadii cunfurtèvuli (è senza anima) è di a "licence club", Mezavia pare surtitu d'un filmu d'orrore pulunese di l'anni 70.

È i dirigenti l'anu detta : volenu ghjucà in Mezavia in L1, trippa pè a "licence club" (chì dà soldi in più). Ebbeh sapete chè ? Anu ragiò è hè tantu megliu.

Iè iè. Quist'annu chì vene, u PSG, l'OM, Lyon, Monaco, Christophe Dugarry è u lonzu di Stéphane Guy veneranu in sti lochi.

Si sò messi à parechji : LFP, DNCG, cummissione disciplinarie. Anu ancu inventatu una regula apposta per impediscelu di cullà : "una cità di menu di 100.000 abitanti ùn pò avè duie squadre prufessiunale... Era in u 1999, u GFCA duvia ghjucà in segonda divisione (era l'epica di Pagis, Van Kets è Pascal Olmeta).

U GFCA si rimetterà d'una falata in CFA per via di a DNCG, d'un'altra falata qualchì annu dopu, d'una cullata in L2 cù una falata dop'à una stagione infernale cun parechje partite di suspensione (è parechji sciambuloni è tambate messe à diritta è manca chì a LFP ferà pagà à u Gaz...) è di parechje altre inghjustizie.

Ùn si sà micca perchè, ma u Gazélec hè un club centu volte ammazzatu, è chì hà sempre riesciutu à rinasce...

Marzu di u 2013, l'àrbitru Tony Chapron volta in i spugliatoghji dop'à u so scaldamentu. A versione officiale dice ch'ellu saluta u publicu aiaccinu cù un gestu simpàticu. Officialmente...

L'Equipe : Chapron a-t-il insulté le public ?

Stagione 2012-13, u GFCA colla in L2, è hè digià un miràculu. I dirigenti a si provanu kung-fu fighting per circà di mantenesi. Gattiva scelta. A LFP ùn apprezieghja micca è falanu scutrate nant'à u Gaz.

Dop'à a partita contr'à Monaco, a lega face un raportu di quelli saliti è pruibisce i scontri in Corsica sin'à a fine di a stagione. Si parla di "insécurité totale du coup sifflet de final jusqu’au moment du départ des arbitres du stade".

U GFCA falerà à a fine di sta stagione ma ritene a lezzione.

Per avà sò numerosi i sustenidori di u Sporting hà avè a simpatia per u Gaz. È vice versa.

Ma ùn hè micca sempre stata cusì. L'annata 1992/93 hà vistu unu di i derby i più duri di l'epica "muderna" trà e dui clubs, cun parechji feriti nant'à u terrenu è incidenti in e tribune. Oghje a rivalità s'hè appaciata.

Ma sin'à quandu ?

Quist'annu chì vene, seremu aspettati custì dinù. Saria bè d'ùn deccunà micca troppu, quantunque...

Imaginate una serata nant'à u Canal Football Club. Ambianza culistretta, Hervé Mathoux lisciu è pettinatu, bimbos in u publicu, custume impecchèvule di Daniel Bravo... è u grande Fanfan Tagliaglioli.

Hè quantunque altr'affare ch'è Vincent Labrune, Jean-Michel Aulas è Nasser Al-Khelaïfi, nò ?

320.000 abitanti, i bugetti i più chjuchi di L1 è di L2, eppuru simu quì.

Ùn vi pare nunda à voi ?

"Affare" di a bandera corsa, incidenti, sanzioni... U Sporting dà e brisgiole à i dirigenti di u ballò francese. À tal puntu chì u so presidente ùn pò salutà i ghjucadori corsi durante una finale naziunale.

È quist'annu chì vene, seranu dui...

Ma chì serà stu "futbol pupulare", messu fora da i stadii, rimpiazzatu da u "futbol di i soldi" ? State à sente st'emissione interessante di France Culture :

France Culture : Supporteurs : tous hooligans ?

Fliccagiu, fisciagiu sistematizatu di i sustenidori, ripressione... chì serà l'avvene per u futbol pupulare in una L1 cummandata da i soldi ?

Cresce a cuntestazione appena da per tuttu in Francia, ma i puteri publichi anu decisu di falla finita cù una certa idea di u ballò, pupulare è cuntestataria. Dumane, tutti cunsumatori !