Charles hà cappiatu u Sporting

Charles Capia ùn serà micca u presidente chì averà salvatu u Sporting. U so bilanciu, malgradu tuttu, ùn hè micca ridiculu :

- mai persu in Furiani
- mai persu in spiazzamentu
- mai persu in campiunatu
- mai persu in Cuppa di Francia
- mai persu in Cuppa di a Liga
- mai persu in Cuppa d'Auropa
- mai persu in Cuppa Intertoto
- mai persu in Copa Libertadores
- 0 scunfitte
- hà lasciatu parte à Salim Arrache
- hà messu fora à Philippe Anziani
- hà datu duie cunferenze di stampa
- ùn hà micca arruvinatu u Sporting
- nisun sbagliu in u ricrutamentu

Nimu, in a storia di u club, hà un bilanciu sìmile !

Mèrcuri passatu scriviamu chì u tempu era à l'ottimisimu cun SuperCapia. Sta sera i sustenidori sò sott'à Prozac, stumacati da SuperLonzu.

Charles Capia ci hà dunque fattu u colpu di a mela cotta. U capimachja d'Unigros ùn hà riesciutu à fà l'unione daretu à ellu. Ma induve a situazione hà bluccatu ? Cun Vendasi ? Filippi ? Lolli ? Per avà ùn si sà.

U Sporting ferma dunque senza presidente, senza avvene, sempre ultimu di L2, cun un tufone di 1 milione d'€ in e casce à 15 ghjorni di passà davanti a DNCG.

Perchè tandu, avè annunziatu à tutti ch'ellu era u presidente novu, perchè avè pigliatu a decisione di mette fora à Philippe Anziani è di scuntrà a ghjente di Sportfive in Parigi ?

Tante dumande senza risposte.

In tantu, rèndenu i sustenidori di Sporting è si ghjoca marti sera contr'à Strasbourg (19esimu). Si Bastia perde, s'averà un pede in National.

U SC Bastia cuntinuveghja d'esse u ghjòculu di certi...