A battaglia pè a difesa di u mare in Sardegna

Annu passatu hè nata una mossa pè a difesa di u liturale. In a zona prutetta di Cala Spinosa, vicina di Santa Teresa di Gallura, c'era u prugettu di creazione d'un puntile per sviluppà l'attività nautiche nant'à un spaziu di sette mila metri quatrati. Un scempiu pè a pupulazione chì s'hè mubilizata.

Sò i citatini sardi, cuscenti di u valore di u patrimoniu naturale di u so paese chì si sò mossi. Hè nata una petizione in linea è u prugettu hè statu interratu (sin'à quandu ?)

In Porto Ferro, sta volta vicinu di Sassari, hè nata un'altra battaglia di u mare. A mossa s'hè chjamata “Giù le mani da Porto Ferro” è sta volta a mubilizazione s'hè fatta contr'à u pianu d'utilizazione di u liturale. Eranu previsti in una natura salvatica trè stabilimenti di mare, spezie di "paillotes" cun parasoli, cabine, spugliattoghji, carreghe longhe...

L'indipendentisti sardi (FIU : Fronte indipendentista unidu) anu prutestatu contr'à a "speculazione" è l'attaccu contr'à l'ambiu ci dice l'agenza ANSA (l'equivalente di l'AFP).

Custì dinù, hè un cumitatu di citatini chì hà purtatu a mossa : pagina Facebook, petizione cun più di 1000 signature in 24 ore, mubilizazione nant'à u terrenu :

Una simulazione di u prugettu nant'à u mare di in Porto Ferro :

In Sardegna minaccianu nant'à u liturale u cimentu, a privatizazione, a marcantilizazione, u business. Cuscenti chì a natura salvatica hè un patrimoniu da prutege è da trasmette à e generazione future, sò i citatini chì si sò mubilizati.

È face ribombu per noi altri Corsi, mentre chì a CTC hà vutatu à l'unanimità per chì e pagliotte possinu stà à l'annu nant'à u mare.