L'altra sera nantu a reta (http://avali.over-blog.net/album-1134472.html) m'aghju truvatu ssu beddu testu, duru e neru, dicci à puntu ciò che pensu eiu. M'è piacciutu e tandu aghju pruvatu à mettalu in corsu, senza autorrizazioni. Mi pari ch'eddu t'abbii un sensu maiori.
U scrittori è Gilles Zerlini, stratu da "Mauvaises nouvelles", edizioni Materia Scritta.
A bonna sera à tutti.
Corsi-k

"Or nun la fetti più finta, chi di fatti tuttu è da venda !

Vinditi i vostri giardini, vinditi li vostri orti, l'arburetti à buleghjiu. Cuì i vecchji c'hani cacciatu, colti i petri una à una e hani carriatu tarra, à fà li vostri masgeri.

Or smunteti li muretti, mancu i scali un laccheti, funtani e archi un sminticcheti, i purtareti à imbiddiscia qualchi parchi di i villà, di stu "bordu di mari".

Sradicheti l'alivi, quiddi di middi anni e più, trapiantetali doppu, vicinu à ssi piscini blù, fatti chi parini fasgioli, e pianteli à cantu à i majestic-palmi, laurifiori e pittispora...

Sighetti i vecchji lecci, prima i più grossi e larghi, poi doppu taglietivi tuttu, v'etti fattu a legna (ecologica, fà calà a "traccia-carbonu") e scaldà i "barbecues",

Or caccietimi ssi fichi e lu murzu di li muri. S'edd'arresta tarri à granu, puneteci papaveru, à divastera laccheti l'orti e i locchi à arburetti.

Or spianteti i tombi, i sepultri smiticati, e ancu i mosolei, lampeti l'ossi di i vostri morti in mari o megliu detteli à magnà àquiddi i ghjaccaretti.

I morti oghji si sà, i femi incinarà, a sò cernara è missa in riliquariu, suminata o sminticata. U fruttu rispamiatu, vintu nantu à ssi tarreni, farà sempri di più cà i vani prigheri anziani.

U marmaru u vi vindaretti e pò li petri tumbali à qualchi rinvindarolu, o fettini puru chjappali, chi cusì risparmiaretti soldi.

Or sighetti à u pedu i croci di farru stazzunatu, un si sà mai, podarani ancu à ghjuvà in quiddi cimiteri ch'eddi facciani avà i ricchi pà i sò ghjaccari.

E turciti i surgenti.

Or spianteti i cappeddi, nantu agna petra mittiti un numaru, invieteli in mari indà in quiddi nazioni troppu ghjovani e senza storia, cu u sò librettu marcatu, ch'eddi sighini riconstruiti.

Spigniti puru i lumi di i fanali.

Di i rittrati di famiglia fettini carti pustali, vinditi i vosti album, di l'anziani i fotò, ghjuvarani ad ilustrà quachi scattula di biscotti o biscuttini.

Sbarrazzeti caschi, kepì, spadi e midagli ; bagliunnetti e lettari da lu fronti. In mari lampeti li armi.

A musei etnografichi dareti tuttu ciò ch'arresta.

Brusgetti i vecchji scritturi, ancu i ceppi di i nutarii.

Detti puru nomi novi à sse villi e ssi paesi ed ancu à tutti ssi locchi, vi truvarani li nomi e la manera di diddi. Un vargugnetivi micca, dattili, s'edda vi pari, numari, culori, nomi di qualchi marchi, di parsonni di u showbiz.

Simittichetivi di i locchi, di u nomi di i pianti, di quiddi di l'animali, di i fiumi e di i petri, di i chjappali e di i prati.

Or lampeti in tarra i stantari e tutti l'infilarati, i stazzoni dinò. Tumbeti l'animali di u celi e di a tarra, di l'acqui e di u mari, ch'eddi siani manzi, retili o salvaticchi, ni fareti pulpetta e fareti a cunserva.
Di u celi, li sò steddi, canceleti puru tutti. Fetti ch'eddu un ci sia più ne a notti ne u ghjornu, cusì laccaretti aparti par sempri i vostri butteghi.

In'a tarrazza di i cafè, canteti canti di guerra, canteti canti sacri. Lacchetivi futugrafià, filmà, interviewà. Lacchetivi fighjulà insinu à lu più prufondu.

Or chitteti i vostri casi, appigiuneti i vostri camari e stanzi e lacchetici puru entra "l'occupants temporaires". Apriiti u vostru lettu e mittitili indrentu, ch'eddi, in vostri piatti, si tecchjani una volta a tola missa. Ch'eddi si leghjissini puru vostri libri, vostri carnè. Di i vostri li ritrati, i laccareti in piazza, laccareti dinò i crucetti, a cromò di Ghjesù Cristu, i midaglii di u 14.

À l'orlu di u mari munteti una pagliota, di i piazzi fettini fieri, e di i fiumi piscini ed infina pà compia, di moli di i porti fettini buati di notti !

Detti la vostra amizicizia nanzu ch'eddi si n'andessini, è sempri un bè di più.

Vostra anima nun vali à venda ch'oramai ghjà persa l'aveti. Ma una volta ch'eddi sò mossi :
Siatti cuntenti e basta... di magnà li sò caccati pezzi à pezzi e à fetti."