Un cumplementu à ciò chè vo avete scrittu:

In una lettara di u 19 di maghju 1769 (pocu dopu Pontenovu), da Corti, Pasquale Paoli scrive à Acchille Murati in Isularossa. L’affari di a Corsica ùn sò ancu sciolti. U generale Pasquale Paoli spera in i Pumuntinchi è tandu a Corsica pò firmà libera ma sè si fiasca, ci vulerà à salvassi.
Acchille Murati (di Muratu, dettu u Cunquistadore di Caprara), unu di i capi di l’armata corsa, ghjè statu incaricatu da u generale Paoli di permette l’esiliu dopu a scunfitta. (U 24 di maghju 1769 ?), da Malfalcu (Egriate) Acchille Murati cù u so figliolu maiò Bartulumeu in età di dodeci anni (a so famiglia s’hè rifugiata in Petralba), parte à destinazione di Livornu (via Oneglia ?) in una barca venuta da Isula Rossa. In ‘ssu portu di Livornu, Acchille nulighja (piglia in nolu) dui battelli inglesi, appughjatu da Antone Rivarola (d’Oletta), consule di u rè di Sardegna. Cun ‘ssi dui battelli, da Portu Vechju (o Portivechju) Pasquale de Paoli è i so fidi patriotti (più di trecentu frà i quali Acchille) si rifugieranu in Tuscana, induve seranu acclamati ghjunti in Livornu. Regnava in Tuscana u principe Leopoldu d’Austria. Paoli lascia i so cumpatriotti è s’avvia per Londra. In Tuscana, u so fratellu Clemente ottene da Londra succorsi è sussidii, à i so lati Acchille Murati è Ordioni di Niolu per l’esiliati chì ghjeranu omancu duie mila (cusì scrive in una nota Achille Murati dettu u Cunsigliere à a Corte Imperiale, figliulinu di Acchille cumpagnu de De Paoli).
Poi ci serà l’amnistia di u rè Luigi XV d’aprile 1773.

Luigi G.