Quella suttana chì purtava à u rispettu. Avà ghjè vera chì a Chjesa hà evuluatu. I preti in civile eppo’ forse, di pett’à a mancanza di vucazione, si accetterà ancu i preti maritati cum’è per i diacuni.
Ma a suttana ùn vulia micca dì chì u prete duvia stassine sempre in chjesa. Quanti preti vicinu à a ghjente ghjuchendu à ballò o à bocce, cantendu è chitarrendu ! Ind’i tempi, facianu da tuttu, scrittura, ortu, ancu caccia o dentistu !
Prete Filippi hà campatu guasi un seculu. Da a Chjesa da giovanu à quella di oghje, cù e so mutazione ! L’abbandonu di u latinu, u francese chì hà pigliatu a suprana (avia rimpiazzatu u talianu cum’è lingua ufficiale à u dicenovesimu seculu), u corsu lingua di u populu soprattuttu parlata ma rialzata pianu pianu cù u scrittu è chì oghje dumanda a so piazza anch’ella. Micca per caccià u francese ma pudè pregà è cantà u Signore ancu in latinu, corsu.
Prete Filippi dettu Gregale ci hà lasciatu belle canzone corse, di stintu arradicatu per a nostra Cursichella.
Luigi G.