A citadella Zuccarelli stà pè cascà. I prossimi à tenela sò i "molli" (di regula, si devria dì piuttostu "l'umuli" ma passemu).
Un aghju più dubitu nant'à l'accessu à u pudè.
I me capatoghji sò di dumandammi à chi ne seremu à issu mumentu quì.
A situazione hè dighjà catastròfica, è forse quandu saremu à e rispunsabilità ùn puderemu micca riparà in tuttu i disguasti d'oghje.
In quant'à me, oghje ùn aghju più nisunu rispettu pè ste generazioni di u dopu guerra chi hanu permessu chi tuttu què accadi. Si parla à spessu di u rispettu di l'anziani, di a famiglia, di l'antenati, ecc. Ma sò elli chi c'hanu messi in una situazione cum'è a nostra. So elli chi hanu distruttu a lingua, chi hanu impeditu u naziunalismu di riesce quandu era encu ora una suluzione, sò elli chi lascianu à i soi "zitelli" un paese arruinatu duve ùn hè più pussibule di truvà un alloghju, mentre chi ci sò millaie di casa à ricconi pè i pinzuti istatinchi, è duve ùn hè più pussibule di truvà un travagliu. Ste generazioni sò elle i rispunsevuli. Senza elle, avriamu pighjatu u pudè è tuttu saria altru dapoi vint'anni.
Mi dumandu un affare. Cunniscite à Denethor, u persunaghju di U Signore di l'Anelli di Tolkien ? Hè quellu chi deve mantene u Gondor, in attesa di u ritornu di u Rè. Mà in realtà hè diventatu scemu - cum'è i nostri - è face tuttu ciò che pò pè impedisce u ritornu di u Rè dà mantenesi ellu stessu nant'à u tronu. A u stremu di a so tuntia, dà l'ordine à u so figliolu - rispettosu cum'è noi - di parte in missione suicidiu dà fassi tumbà. E u figliolu a face. Dopu dà l'ordine à u so figliolu di fassi brusgià. Oghje campemu in Corsica in un circondu psiculògicu paghjesu, è ch'omu purria battizà "u cumplessu di Denethor".
Sin'à duve a vostra pietà figliulina anderà ? Sin'à u suicidiu cullitivu ? O cum'è me ete da disubidisce è capisce chi i nostri sò scemi è incurabili ? E ch'ellu ci vole à guardalli cum'elli sò in rialtà, di manera ughjettiva ?