È torna à Vignale ! È torna torna à Vignale !
Un pocu di pietà per a ghjente di Vignale, quantunque, i corcii !!

È torna u sunniacciu riprincipia sempre à invelenà l’anime, è à sempre veste a nostra cara è corcia Corsica di i so panni di tristezza, di dolu, è d’affanu.
È hè sempre u stessu scumpientu, u stessu spaventu, u stessu odiu di sta situazione cusì generatriccia di doli.
Ogni volta, à ogni assassinamentu, sempre simu à l’addisperu, è sempre preghemu, senza credecci mancu una seconda, ch’ellu sia veramente l’ultimu mortu.
Ùn ci credimu micca, simu sicuri ch’ellu ùn serà l’ultimu mortu, è puru perseguitemu di sperà.

À ogni assassinamenti, certi, per amminurì u dolu, si dicenu, provanu di cunvinchessi ch’e quale ch’e a vittima era statu un gattivu sughjettu, forse un maffiosu o un maffiusellu, è ch’ellu avia meritatu a so situazione, ch’ellu avia meritatu di more.
St’analisa mi dispiace più ch’e propiu, prima perchè in a mio filosufia, cunsidercu ch’ogni vita hè sacrata, è chì nimu ùn merita l’assassinamentu, è dopu perchè hè una manera di velà u prublemu, di reducellu à a so più minima spressione. Seraghju sicuramente l’ultimu à negà ch’ellu ci sia un veru prublemu di criminalità è di maffia in Corsica, un prublemu più ch’e maghjore chì annegà a nostra tinta Patria sott’à un oceanu di maldestinu.
Puru, è per mè, ogni vita umana hè sacra
A morte d’un omu, a dicu, hè sempre un drama.
Ma quandu sta morte ùn hè ne naturale ne accidentale, hè tuttu una tragedia, è u dolu ùn si stancia.

Di sicuru, si dice ancu chì certi assassinamenti eranu per vindicà un altra morte, è ch’ella hè a nostra « cultura » ch’e di vindicàssi.
Ùn sò manc’appena d’accunsentu una seconda.
Per mè, a « cultura » ùn hè manc’una stundetta una scusa valevule.
L’assassinamenti sò scumpienti tamanti, è per esse sempre statu diffensore di a cultura corsa, sò assai primurosu ch’e certi abbandunessinu sta "tradizione" cusì infama.

D’altronde, a vindetta ùn appartene micca à u campu di a maghjorità di l’assassinamenti, è sò propiu luntanu d’esse cunvintu ch’e i morti ebbinu tutti i mani insanguinati. Inoltre, pensu ch’ellu seria fà inghjuria à a so memoria ch’e di sempre imbruttàlli, dicendu ch’elli sò morti perchè avianu tombu, è ch’ella hè un bè.
I morti, ancu per ùn esse micca tutti nucenti, ùn eranu micca tutti culpevuli.

U sangue ùn lava nunda.




PS : scusate, ma ùn aghju micca avutu u tempu di scrive un articulu nant'à u mio bloggu nant'à stu sughjettu.