In Corsica ci hè di più "grues" ch'è stàntare

Ùn a sapete forse micca, ma in corsu, a parolla "grue" si dice àrganu.

Eppuru, ne vidite tutti i ghjorni in u nostru paisaghju. Sò diventati u nostru cutitianu, à tal puntu ch'è vo ùn e rimarcate mancu più. Nanzu quand'è vo ne scuntravate unu, vi diciate "buh ! ancu quì custruiscenu avà, in stu lucacciu persu ? Quale serà u tontu chì s'hà da cumprà una casa quì ?"

Avà, àrgani ci n'hè non-stop nant'à a strada da Bastia à Bunifaziu. In bor'di mare, in bor'di strada, in bor'di fiume, in paese... Ci n'hè da per tuttu.

D'altronde, vi site digià postu a quistione di sapè quantu ci hè àrgani in stu mumentu in Corsica ? I nostri antichi luntani, quelli di a prestoria, ci anu lasciatu e stàntare, e "statues-menhir". Ci n'hè circa una settantina in Corsica.

È noi, chì lasceremu à e generazione future ? Casali, centru cummerciali, orrori, bastimenti goffi, immòbuli grisgi senza anima, palazzi culuriti chì imbruttanu u paisaghju, parkings, è ronds-points.

Ùn seranu forse micca assai fieri di noi, i nostri figlioli... Ma bon, ci ne impippemu, postu chì "ça va créer des emplois". Nò ?

Allora, quantu àrgani ind'è noi ? Mandate i vostri ritratti di "grues" nant'à apiazzetta@free.fr