Corsu o connu ?

L'affari vanu più in furia in futbol chè in pulitica. Allora chì nisun grande candidatu à l'elezzione presidenziale parla di ricunnosce l'esistenza di u populu corsu (i soli sò Philippe Puttù è Eva Joly), in u mezu di u ballò francese l'affari sò chjari : u populu corsu esiste.

Era digià u casu di Jean-Michel Aulas (ma forse era perchè s'era pigliatu unepochi di scuzzulate in Timizzolu).

Dapoi sta dumenicata, u populu corsu hà un novu difensore : hè u difensore di u LOSC, Aurélien Chedjou. Averia trattatu à Johan Cavalli di "sale corse" durante a partita Lille - Aiacciu è avà l'affare cummencia à fà u rimusciu.

A LFP hà dettu ch'ella hà apertu una inchiesta. Allora avà, chì dicerà a LICRA ? Chedjou serà suspesu da a cummissione di disciplina di a liga ? Chì serà a riazzione di Thiriez, sempre u primu à accusà Bastia di razzisimu ?

Chedjou ellu si difende : ùn hà micca dettu "sale corse" ma "sale con"...

Una cosa hè certa : u futbol francese si porta sempre cusì bè.