Zizounacciu in Sperone
Hè un'infurmazione data da Backchich : Zinédine Zidane si piglia anch'ellu a so villà in Sperone. Bisognu di fà i cummenti ?



Tuttu turisimu : sempre di più
Da sente nant'à Alta Frequenza un'inchiesta di l'INSEE : l'ecunumia corsa và megliu per via di u turisimu. A Corsica ne diventa dunque sempre appena di più dipendente. U BTP ellu si porta benissimu. T
uttu và bè dunque ! U bettone corre, i turisti ghjunghjenu in forza. Felicitemuci, a Corsica si porta bè, a ci dicenu i sciffri ! L'avvene di a giuventù : fà u pizzaghjolu o vende i Mister Freeze l'estate à u mare. Evviva u prugressu.


Sarko s'annerba contr'à France 3
Da vede sta videò pigliata nanz'à u diretta di un'emissione di France 3. Ci si vede à Sarko annerbassi "ça va changer là, ça va changer"... Si dice ch'ellu averia cruciatu un impiegatu chì avia un t-shirt "plus belle la vie sans Sarkozy"...

Selezzione naziunale corsa : Ludovic Giuly è Jean-Baptiste Pierazzi dicenu di sì
In l'ultimu nùmeru di a rivista Corse Foot Pierazzi è Giuly anu rispostu di sì à a dumanda s'elli accetterianu di ghjucà per una squatra naziunale corsa. L'idea avanza, ancu ind'è i ghjucadori prufeziunali...

Webzinemaker, una riescita corsa...
Ùn cunniscite micca à Webzinemaker ? Purtantu quand'è vo venite nant'à A Piazzetta, hè grazia à st'intrapresa. Webzinemaker vi prupone di creà u vostru situ o blog (formula gràtisa o pagante) di manera a più sèmplice pussibule, senza nisuna cunniscenza informàtica è cù un risultatu propiu bellu. In più di quessa, sò cumpetenti, è... corsi. L'intrapresa aiaccina cunnosce un bellu successu, ricunnisciutu da tutti, fidighjate ciò ch'elli dicenu à 01.net. Si pò dunque esse corsi, riesce in u duminiu di e tennulugie nove è creà impieghi in stu paese...

Un situ novu : Union Corse
Hè natu u situ Union Corse. U scopu : mette in rete nant'à a tela quelli chì sò attaccati à a Corsica. Ideale pè permette l'aiutu, fassi cunnosce o sviluppà a so intrapresa. L'aiutu è a sulidarità corsa nant'à internet, hè u scopu di i so creatori...

Ùn si sentia più parlà di Gilbert Casanova dapoi qualchì tempu è eccu chì l'omu face forte : u so nome s'hè ritruvatu in prima pagina di tutti i media francesi.

Ci vole à dì chì l'affare hè originale. Un tràfficu di droga in eliccòtteru da u Maroccu chì duvia dopu parte in direzzione di a banlieue parigina.

I media anu avutu difficultà à definisce à Gilbert Casanova. Prima presentatu cum'è un "notable corse ", dopu cum'è un " ex-notable ", finalmente si ritene " ex-figure du nationalisme ".

Face assai "ex"... Hè chì u tippu ùn c'era più.

Al dilà di a magagna nant'à l'anziani di u Mouvement Pour les Affaires, chì ritenerà a storia di a generazione di i naziunalisti di l'anni 90 ?

Chì bilanciu si ferà di i Charles Pieri, Alain Orsoni, Jean-Martin Verdi, François Santoni, è astri Gilbert Casanova ?

Chì sò state e vittorie per u populu corsu, qualesse l'avanzate purtate da st'omi ?

Per avà si trattà sempre d'attualità è ùn ancu di storia, è l'affari sò troppu freschi.

Forse ùn avemu ancu abbastanza rinculu per parlanne di manera ogettiva, senza passione.

Ma un ghjornu, per ùn micca cascà in i listessi errori, per preparà una Corsica chì sia sana, ci vulerà bè à fallu, stu bilanciu...

È voi, chì ne pensate di sta storia ?

PS : Ci hè un prublema tennicu cù i cummentarii ma pudete parlanne nant'à u forum

U ballò hè un ghjocu spurtivu, ma un ghjocu sopr'à tuttu. Quandu hà principiatu l'Euro 2008 di ballò, i guverni, l'uffiziali, a ghjente, u cuntinente sanu si sò cunciliati pè di chì sta cumpetizione internaziunale sarebbe a circunstanza a più favurevule pè cambiassi l'idee è permette à a ghjente di sminticà i so prublemi ecunòmichi, cum'è i prezzi scemi di a benzina, di a manghjusca, u disimpiegu, ecc.

A saperanu Chirac (chì n'hà apprufittatu in u 98 incù u scunvugliu di u 12 di lugliu) è ancu Sarkozy (mà ellu aspetta sempre una vittoria francese... è po aspettà per un pezzu), ùn ci hè nunda di megliu pè rallegrà i populi ch'è e partite di ballò...

Averanu ragione di siguru, occasioni di festighjà ci n'hè statu à pallittate durante quellu Euro. Per esempiu, e vechje amicizie trà vicini si so rinfiarate, cum'è incù l'Alemani è i Pulunesi ; l'allegria fù cusi forte chi tuttu u mondu in Alemania è in Austria s'hè lasciatu purtà dà a musica.

Certi paesi, chì ùn s'eranu micca qualificati pè u cunfrontu, anu trovu manera di pigliassi à u ghjocu, cum'è in Busnia, induve l'abitanti anu fattu onore à u spiritu spurtivu, è celebratu a so storia in u stessu tempu.

Infine, tutte e generazioni si sò mischjate è ancu l'anziani anu pussutu avè parte à a festa di u ballò

È ancu u simpaticu Slaven Bilic, l'intrenore u più rock'n'roll di stu campiunatu, ùn si lascia micca affannà dà a pressione di e cumpetizione: hà trovu una manera d'ammurbà l'ambiente in i spuliatoghji grazia à u rock. Cum'è si dice in francese, a musica ammansa l'usanze.

Nant'un modu più seriu, ùn si pò ch'è custattà chì ogni volta ch'ellu ci hè una cumpetizione di ballò in Auropa, risaltanu aspessu sturiacce di u passatu chì ùn anu nisunu riguardu incù u sportu...

Cumu averanu campatu l'omi à l'Età di Mezu ? S'è vo erate in Bastia ghjovi passatu, averiate avutu forse un principiu di risposta : stavanu senza acqua nè elettricità.

Di solitu, hè l'unu o l'altru. A vechja canalizazione bastiaccia, avà a cunniscimu chì di tantu in tantu schjatta. O allora tocca à e vechje centrali rughjinose di u Vaziu o di Luccianu di mustrà segni di fatica.

Ghjovi dunque, eranu i dui in listessu tempu : a canalizazione in Furiani è ancu l'elettricità in Bastia.

L'inguernu, n'avemu digià parlatu hè quand'elli cascanu trè fiocculi di neve chì tuttu si pianta : strade bluccate, panne d'elettricità, paesi tagliati da u mondu.

È cum'è sempre, ùn ci hè mai rispunsèvuli...

Allora ? Bastia capitale di u Terzu Mondu, nanz'à Uagadugù ?

Durante una intervista, à a fine di u scontru, invece di parlà di u so avvene prufessiunale, hà preferitu dumandà in matrimoniu a so cumpagna Estelle Denis, 32 anni, presentatrice di l'emissione 100% Foot (M6) è mama di i so dui figlioli.

« La seule chose à laquelle je pense maintenant c'est de me marier avec Estelle. Je lui demande sa main » avia rispostu à u ghjurnalista.

U lindumane, Raymond Domenech s'hè puru scusatu di u so « manque de sérieux ». Ghjera, secondu ellu, un mumentu « d'humaine faiblesse » è un sbagliu di cumunicazione…

Estelle Denis, per contu sogliu, ùn hà tantu appreziatu sta quistione « peu romantique » davanti à millioni di telespettatori. D'altronde, hà fattu sapè ch'ella ùn li rispunderà micca publicamente.

Ritornu annantu à st'affare ghjudicatu di buffunescu da i media è numerosi ghjucadori di ballò, trà e duie videò principale, aspettendu i vostri cumenti :

A videò di a dumanda di matrimoniu in diretta
A risposta d'Estelle Denis, chì ùn hà dettu di sì...

Ahmed Zumar ci spiegava qualchì ghjornu fà, davanti à a mubilizazione dèbbule in Balistra ch'ella cala a demugrafia militante in Corsica.

Manc'appena ! Perchè tantu pessimisimu ? I Corsi oghje sanu mubilizassi pè e grande cause chì meritanu d'esse difese.

L'ultima chì hà fattu a prima pagina di Corse-Matin : quella di a TNT

Sapete, a TNT... micca quella chì salta, l'altra : a télévision numérique terrestre, st'immensu prugressu di l'ummanità chì vi permette di riceve l'emissioni di Direct 8, TMC, NT1, Waika9...

Puderete cusì fidighjà e ridifusioni di l'episodii Derrick, Hélène et les garçons, Les Cordier juge et flic, u Télé-achat o i clips di Pascal Obispo tuttu què gratisi è in qualità numèrica, per piacè.

Perchè ci vole à sapè chì oghje si sterpanu innù i paesi... È cumu sarà ch'ellu si chjappa à NRJ 12 in Brusticu è micca in Pedipartinu ??? Allora s'infiaranu i dibattiti di i cunsiglii municipali, chì si spiccianu di vutà muzioni per chì u relais li mandi appena di ciò chì a televisione francese sà fà di megliu.

Ci vole bè ch'ella sia rotta a frattura numèrica, nèh ?

Iè chì i Corsi sanu mubilizzassi per chì u nostru paese entri infine in a mudernità è u prugressu !

L'Euro : sfocu, cunsumerisimu identitariu è fratellenza

Pudiamu tandu pensà ch'elli si tazzerianu i sustenidori à l'infora di i stadii. Mancu appena, l'avemu visti magagnà si di quandu in quandu, sempre di modu fraternu. Megliu, piena ch'ella hè di turisti a cità di Praga avi ritrasmessu l'altru eri u scontru tremendu trà a Republica Cecca è a Turchia. Mancu à dilla chì i turisti prisenti ancu subitu pigliatu a pratesa di i Cecchi!

Bandere bianche, turchine è rosse à buzeffu ma dinù Pinzuti, Inglesi o Tedeschi chì striddavanu, impenseriti per l'avvene di a squadra cecca... Mi dicerete chì e soie e squadre, cacciate o quasi ch'elle sò da a cumpetizione, a tensione hè poca poca... Ma hè quessu u miraculu di u ballò, s'ellu pò ghjuvà à u sfocu di e ghjente, participeghja dinù a una certa cummunione. À participà à sta cummunione, soca, ùn ci serà solu u ballò. Ci hè da scumette ch'ella ci entrerà ancu per un suppulellu a biera dinù. Al di là di e solite partite di ballò, l'Eurò serà un pretestu per sfucà si è per fratellà. Tenite un esempiu tremendu! Si sò viste bandere, micca rosse ma russe in Praga, 40 anni dopu chì ci scalessinu i tanchi di l'armata rossa...

L'Euro è a Corsica : à quandu una squadra corsa per mughjà tutti inseme?

In quantu à noi, qualesse seranu e cunsequenze suciale di st'eurò? Ci hè da pensà chì a riescita di a squadra di Ronaldo porti i zitelli Purtughesi di Corsica à identificà si nun solu à stu ghjucadore ma dinù à u so paese. Sò elli chì tornanu à e so "radiche"... Cusì, grazia à i carissimi principii republicani chì impediscenu a ricunniscenza di u populu corsu è via a furmazione d'una squadra corsa, a leia suciale si sbrisgliuleghja in Corsica, creendu cummunità di tutte e mamme. A nome di l'ugualità, a Res publica diventa pianu pianu una Res privata...

Aiò, ch'elli vaghinu à imbriacà si ancu elli sti cusì detti sapientoni...

Sustenitori è turisti, accolti nant'à a piazza di a cità vechja di Praga.

V'avemu digià parlatu nant'à u blog d'una squatra naziunale corsa è di a so bella vittoria 2 à 0 contr'à a Francia in u 1967. Si ne parla di più in più è u gruppu di Facebook "pour une sélection corse de football; hà francatu i 250 membri...

Ma cum'è coach, à quale mettimu ? I candidati sò parechji, è vi prupunemu di vutà in un sundame è di dà u vostru parè innù i cummenti.

Eccu qualchì pruposta :

Freddy Antonetti : u Casinchese hè siguramente l'intrenore corsu u più cumpetente. Noi femu a scumessa ch'ellu pò esse un coach di classa mundiale è chì e so zerghe meritanu d'esse cunnisciute à u livellu internaziunale. S'ellu hè in gamba, hè ancu capace di piglià à Domenech à panette. Allora forza Antò !

Jean-Michel Cavalli : L'Aiaccinu hà una sperienza internaziunale : hè statu à u capu di a furmazione d'Al Nasr di Riyad, di u Wydad de Casablanca, di l'US Créteil-Lusitanos è di Ionikos Le Pirée. Di chè fà trimà Marcello Lippi !

Fanfan Félix : cunnosce bè u ballò corsu per avè intrenatu à L'Isula Rossa durante tanti anni, purtendu a cità balanina sin'à a terza divisione. Ma ùn u pigliemu ch'è s'ellu cambia di cuppa di capelli.

Battì Gentili : Hà intrenatu tutti i clubs aiaccini pussibuli, avà hè in Nantes. Perchè micca ?

Robert Nouzaret : U campione di e falate in segonda divisione hà marcatu i Bastiacci quand'ellu hè venutu in Bastia. Ma forse vulerà selezziunà una volta di più à Dieuze è à Bernard Lambourde ?

Raymond Domenech : Più nimu ne vole, mancu Estelle Denis... Forse chì u puveracciu vulerà piglià a squatra naziunale corsa ?

Giovanni Trapattoni : Da mette in a rùbrica di i coachs azezi cun Antonetti. U sosie di Nicolas Alfonsi hè ancu più impressiunante quand'ellu mughja in alemanu...

Robert Herbin : U Sphinx puderà rilancià a so carriera in Corsica ?

Guy Cimino : S'ellu hè pigliatu cum'è selezziunadore, li ferà una bona scusa pè piantà a so carriera d'attore.

François Tortos : Cugnumatu à France 3 "le sorcier belge", u giurnalistu hè in fatti un fine cunniscidore di u mondu di u ballò. A prova : hè ancu abbunatu à "Onze-Mondial".

André Paccou : Almenu s'è no u pigliemu ùn ci feranu più cacà cun tutte ste storie di razzisimu. Bon, manca appena di classa à cant'à Marcello Lippi o José Mourinho, ma ùn si sà mai. S'ellu si taglia a coda di capelli è s'ellu ùn mette più e so calzette cù e so ciavatte ?

Vincent Tabarani : Ellu sì chì sà manighjà u pulendaghju per fassi rispettà da i ghjucadori. Attenti à e bastunate !

Gilles Simeoni : Da per tuttu, ùn ci n'hè più ch'è per "Gilles" chì hà ancu e so groupies chì u seguiteghjanu in ogni locu. Hà riesciutu u miraculu di fà ghjunghje una lista naziunalista in testa di l'opposizione in Bastia è d'interessà e giovane bastiacce à a pulitica. Allora perchè micca un miraculu à u capu di a nostra squatra naziunale ?

U Père Fouras : Hà pigliatu un colpu di vechju ma hè sempre quellu.

Estrimei : Ùn ci capisce nunda à u ballò, ma u cummentadore u più azezu di u web nustrale ùn parlerà ch'è corsu à i giurnalisti è i ghjucadori. Cusì seranu anch'elli obligati d'amparà a nostra lingua !

D'altre pruposte ? L'aspettemu !

Hè quessa a decisione chì inzerga l'usteriaghji. Mentre si sviluppanu i voli low-cost in Europa, capiscenu male u perchè di sta misura chì à contu soiu, averà un impattu negativu nant'à i so rivenuti.

U turisimu : da a quantità à a qualità?

Fattu si stà chì a crescita di u volu Parigi-Bastia averà di sicuru una cunsequenza nant'à i cunsumatori. S'ella vene cara assai a destinazione "Corsica", averebbe da calà, di modu mecanicu, a quantità di i turisti. Per mantene o accresce i so rivenuti, ci volerà à accoglie turisti più carchi à soldi chè quelli oghjinchi è avè per scopu di sviluppà a qualità nant' à a quantità. Prima perchè ci lascianu di più soldi è secondu perchè u costu cullettivu di u turisimu rivene più bassu. Si capisce faciule. Ancu puru s'ellu ci vole à mudernizà le, l'infrastrutture acquale, stradale o purtuarie ùn averanu à esse cusì pisive chè in l'andatu d'un turisimu quantitativu di pumataghji è di ranciconi...

A mundialisazione di u turisimu

Ma oghje chì hè oghje, sta logica pare ch'ella venissi appena simpliciotta. Accresce a qualità contru à a quantità ùn vene cusì faciule. Da u dì à u fà, ci hè quant'è da u tesse à u filà, dice u pruverbiu...
Prima perchè l'ottelli nustrali di trè o quattru stelle sò scarsi. Averemu dunque un ufferta di trasportu carissima per un pruduttu turisticu mezanu. Secondu, vistu a cuncurrenza in u settore di u turisimu, di e mode, di e brame di e ghjente è sopratuttu di u so putere cumpraticciu, st'evuluzione, ancu s'ella pò pare bona, si palesa difficiule da mette in ballu senza un aiutu forte à prò di a mudernisazione nun solu di l'ottelli ma dinù di a qualità di l'ufferta turistica à u pianu di l'attività è di i servizii resi à i cunsumatori.

Campà di u patrimoniu

Infine, st'evuluzione à prò di u qualitativu vene appuntu da ramintà à u puliticanti quantu u pruduttu turisticu "Corsica" abbisogna cure è prutezzioni di tutte e mamme. A valurisazione di i nostri circondi ùn si deve più fà solu per ideulugia à prò di a difesa di a "terra", ma di dinù di modu utilitarista, interessatu, prammaticu, à prò di u sviluppu ecunomicu. In stu filu custì, e nostre machje è a nostra identità, sò a nostra più grande ricchezza...