Accolta > ATTUALITÀ CORSA

Schisofrenia corsa

Semu tutti attaccati à u nostru paese ma... ùn ci cullemu mai.

Mai ùn vinderiamu a nostra casa in paese ma... ùn ci stemu ch'è trè ghjorni à l'annu.

Vulemu tutti difende a nostra cara lingua corsa... ch'è no ùn parlemu mai.

Vulemu mette fora tutti st'eletti manghjoni è trafficoni... per qual'è no vutemu à e prussime elezzioni.

Mughjemu contr'à u "clanu" è u piston ma... semu tutti clanisti è circhemu u pistò pè truvà una piazza.

Vulemu lampà fora sta Francia assassina chì ruvina ma... semu tutti funziunarii.

Ci stumacanu i turisti è mughjemu contr'à i pumataghji ma... sò sti catini à facci campà.

Ci faticanu i pinzuti ma... subbitu ch'ellu n'hè scala unu, li femu e manere.

Semu contr'à e bombe è a viulenza ma... quandu qualchì villà in bor'di mare salta, ci ralegremu.

Vergogna à tè chì vendi a terra... ma aghju messu a casa in paese nant'à ebay.

Parlemu tantu di a famosa sulidarità trà di Corsi ma... passemu u nostru tempu à esse ghjelosi l'unu di l'altru è à tazzacci trà di noi.

Femu tutti i ribelli ma... travagliemu à u Cunsigliu Generale.

Mi dicu di manca ma... mi techju di suvvenzioni è mi carcu di soldi à colpi di marcati trafficati.

À a radio dicu chì a droga, ùn hè micca bè ma... ne facciu passà tone in eliccotteru.

Sò naziunalistu è vogliu fà a rivuluzione... ma mi stò in casa meia.

Mughju contr'à Clavier, Séguéla è a bettunizazione ma... mi facciu u mo lotissement pè appigiunà l'estate.

Aghju messu l'autocollant di Che Guevara ma... nant'à u mo Porsche Cayenne.

Tulerenza, sulidarità ma... sò un patrone chì pigliu à calci in culu i mo impiegati.

Sò ripublicanu è rispettosu di a demucrazia ma... sò u tercanu pè arrubbà l'elezzioni è pè a froda.

Tutti ribelli, tutti fratelli ma... semu tutti i servi d'un clanu, d'un patrone, d'un sistema.

Lingua corsa obligatoria ma... ùn l'ampargu è ùn a parlu micca à i mo figlioli.

u 23 di Marzu 2009

U Sgaiuffu

Accueil

Envoyer à un ami

Version imprimable

Da u più recente à u più anzianu | Da u più anzianu à u più recente

64.mandatu da Sylvain Pafumi u 30/04/2011 21:52

Cette année, on n'a pas de chance! Toutes les fêtes du mois de mai tombent en dimanche.
Cume avreva dettu u poveru Petru-Paolu : "Quest'annu, ancu u lunedi di Pasqua casca in dumenicu!"

63.mandatu da Sono calabrese e me ne sbatto le palle u 24/10/2010 16:39

O "so corsu e ne so fieru" dicisti accussi :" à i mo figlioli, à a scola, li facciu amparà l'inglese è u tedescu perchè sarà più utule per elli quand'elli sparcanu i turisti, sopratuttu Americani è Ullandesi ".
E quandu finisci u petroliu ( n'tà pochi anni), i turisti scordartivilli, ca chiji si stannu a casa, e n'tà Corsica non arrivanu chjù no c'à barca a vela e mancu natandu... I fighjoli to (benedizioni u n'dannu) meghju u s'imparanu u zappanu e u lavuranu a terra, certu non è bonu p'à schina, ma armenu si mangianu nu piattu i suriaca (fagioli, haricots, beans, bunen) Saluti a voi...

62.mandatu da alivu u 03/05/2010 15:30

Tutti quant'è no simu, vulerìamu avè e botte piene è a moglia briaca.

61.mandatu da alfredo u 19/02/2010 09:28

Post scriptum

I am currently working in Naples, where the official language is Italian, yet the Neapolitan is spoken and understood by all. Everyone talks Neapolitan always, in fact it is the true language of the city. On the radio, the songs are in Neapolitan. People talk the Neapolitan, because the Neapolitan is a language of the Italian peninsula.In Malta the situation is different. two centuries of British rule have endangered the Maltese language.

60.mandatu da alfredo u 19/02/2010 09:15

I'm Lombard, I apologize to use english in my post. I can read and understand corsu. I could write in italian but I don't want to seem an invader. I'm sorry to have read the message 44 "sò Corsu è parlu u corsu ma quandu scontru un talianu li parlu in inglese è facciu nice d'ùn capì nunda" . Being of Italian culture does not mean being Italian of citizenship. You must see Canton Ticin in Switzerland. They are swiss, their first language is the lombard dialect but they use italian officially speak italian. They are not italian. In "Val d'Aoste" the patois is the real language. Ironically, the areas where Occitan was better preserved are the valleys of Piedmont. The Occitan has been destroyed in France.
So you favorite the pinzuti. You are destroying your culture. Your children will be only french speaking. I know your ancestors competed in poetry about Dante's Divina Commedia.

59.mandatu da piratella u 29/09/2009 18:55

Mi chjamu "Ghjuvà" è ùn sò dì mancu una parolla di corsu

Ma a mo figliola si chjama "Angie", hè in scola bislingua è ampara u corsu (bò, alè, menu male...-)))

58.mandatu da Culomba u 09/09/2009 02:47

Difendu a lingua corsa ma facciu tuttu in francese : scrivu in francese, parlu in francese è contu nantu à a scola per amparà u corsu à i mo figlioli, ...

57.mandatu da Elvira u 21/08/2009 16:28

allora feti la finita è stati à senta u pueta ; ùn andeti à vutà pà 'ssu purcedacciu techju!

56.mandatu da vinz della conca u 21/08/2009 12:40

So elettu ump e cantu l'elettu quandu so briacu... -_-'

http://casalta.ifrance.com

55.mandatu da marbeuf u 28/06/2009 13:25

sò un clanistu finitu è votu UMP à tutte l'elezzione ma ognitantu, in certe serate corse, mughju cum'un scemu canti di naziunalisti arrabiati... Què l'aghju vistu parechje volte è mi face ride

54.mandatu da sbagliu u 26/06/2009 21:52

Sò prònta à da lezziòne di murale à ognunu,ma mi sbagliu ancu.(paulu un'hè ministru).

53.mandatu da Piratella u 15/06/2009 19:41

Sò un partitu "di manca" ma mi lasceria bè cumprà da Sarkozy è rinfurzeraghju a diritta à e prossime elezzione territuriale...

52.mandatu da MELANCHON PAS TOUT u 24/05/2009 22:24

So naziunalistu Corsu è vogliu fà a Revoluzione, ma so prontu a pusami a cantu a unu di più accaniti puliticante francese anti-corsi, si i" naziunalisti-internaziunalsti Corsi ";votenu per me a e prossime elezzione auropéee.

51.mandatu da Sò corsu e ne sò fieru u 22/05/2009 20:05

Iscia, quand'e ci pensu…

50.mandatu da Sò corsu e ne sò fieru u 22/05/2009 20:03

Da ciò ch'aghju intesu avà ind'u postu à Corsica sega, a schisufrenia corsa hè di male in peghju, quant'è a pincondria. Ci tocca dunque ad aghjunghje: sò Corsu ne sò fieru, fieru di issu populu liberu, malediscu a Francia, ma… votu à u Front National. No coment

49.mandatu da So corsu e ne so fieru u 20/05/2009 16:54

Ghjè vera ciò ch'ella dice Culomba: ghjurnali in lingua corsa cum'è a Muvra avianu assai lettori, tantu più chì u talianu si cunniscia sempre è chì u sistema graficu era statu adattatu da quellu di u tuscanu-talianu (-u invece di -o, cchj invece di -chj), è quessa dipoi u 1875, dunque, ùn ci vole micca à stupissi. E eranu ancu fieri, i nostri vechji, di pudè leghje issi ghjurnali.

48.mandatu da Culomba u 17/05/2009 15:12

Micca d'accordu o Balanì : aghju fattu a sperienza eiu anni fà è aghju scunvintu dinù assai ghjente di francà u passu anch'elli . Ci sò ch'ùn sò cusì vechji è chì sò corsofoni!! Parlu di capisce per LEGHJE, micca per esse capace di SCRIVE, sò duie cose belle differente. Di u tempu di "a Muvra" a ghjente lighjianu senza avè amparatu à leghje u corsu in iscola!! Eranu numerosi ! È "A Piazzetta" mi pare ch'ella hà assai lettori, chì ùn anu tutti amparatu à a scola.

Fora di u ghj è chj, una volta chè t'ai capitu, ùn ci hè nisuna difficultà : hè scrittu in u santacroce latinu, nò, micca in ieroglifi?

47.mandatu da Balaninu u 17/05/2009 14:27

Iè infine mi scuserai ma à spessu sò i vechji chì dicenu què, è à u so età si capisce ch'ell'ùn anu micca u laziu di circà à capisce u sistema (ci vole più d'un ora pè capiscelu u sistema...)...

46.mandatu da Culomba u 17/05/2009 09:21

Parlu corsu, sò alfabetizatu è pritendu d'ùn sapè leghje u corsu (invece chì mi piglierebbe un'ora di capisce u sistema di grafia...)

45.mandatu da So corsu è ne so fieru u 11/05/2009 17:48

Eppo torna :
- à i mo figlioli, à a scola, li facciu amparà l'inglese è u tedescu perchè sarà più utule per elli quand'elli sparcanu i turisti, sopratuttu Americani è Ullandesi
- ùn aghju micca bisognu d'amparalli u corsu chì sò Corsu è dunque cume sò parlà u corsu, i mo figlioli, essendu di u mo sangue, u sanu dinù
- ùn li facciu micca studià u talianu à scola chì u corsu (chì ùn l'ampargu micca) si spruglieranu sempre
- aghju dumandatu a traduzione in francese di tutti l'archivi corsi perchè ùn ci capiscu nunda à isse lingue straniere

44.mandatu da So corsu è ne so fieru u 11/05/2009 10:05

CI vulerebbe à aghjunghje:
- sò Corsu è parlu u corsu ma quandu scontru un talianu li parlu in inglese è facciu nice d'ùn capì nunda
- Sò Corsu è naziunalistu ma a casa di paese chì mi vene da l'antichi l'aghju venduta ad un Pinzutu maritatu cù una Tedesca è chì à a casa di i mo vechji li hanu dati un nome inglese
- d'altronde, da pidochju rifattu m'aghju fattu una casa ind'unu di i circondi di una cità corsa, cun baies vitrées, volant roulant et nains de jardins, per mantene e tradizione corse chì mi sò cusì care.

43.mandatu da estrimei u 26/03/2009 18:14

cunoscu a parulla picondria , e mi pare ch'ellu si dice avè a picondria.
avà , mi tocca a palisà chi s'avia avutu a traduce u francese "dépressif " , un'averia micca pensatu a sta parulla ghjustissima di picondria .

42.mandatu da ZIU ANTO U PURCAGHIU u 26/03/2009 11:22

diceraghiu piotostu sciminghiuliti.Queddi lampinu soldi assai i nostri copizzoni e cusi ci ne stému cuntenti di a nostra sorté. Eviva u populu corsu ! ! ! ! !

41.mandatu da Culomba1 u 26/03/2009 00:52

Simu tutti i "Monsieur Jourdain" di a picondria. Ma per dilla franca ùn sò sè "depressif" hè a bona traduzzione di "picondriacu" lol

40.mandatu da altore u 25/03/2009 21:17

o culomba veni d'amparà mi una parolla... à ringrazià ti. sò corsu parlu corsu ma ... un sapia micca dì dépressif (averebbi dettu depressivu)

39.mandatu da Culomba1 u 25/03/2009 20:53

Sò un Blogu scherzosu ma...aghju i clienti picondriachi (dépressifs)

38.mandatu da Piratella u 25/03/2009 20:48

Aiòne!!!! fintantu chì ci serà u spiritu chì soffia in Bloghi cum'è quelli di "a Piazzetta" o di "Via macagnola" (Mdr a so campagna pè a prumuzione di l'agriCulu corsu) simu salvi!!

Dumanda niscentre : hè vera ciò ch'ellu hà dettu sta mane Petru Mari chì via macagnola hè u Blogu ufficiale di u sindicatu "Via campagnola" ? LOL

37.mandatu da heliofobu u 25/03/2009 19:53

Pruverbiu nustrale (intesu in Capi Corsu...) dà riflette :
"U Corsu, quand'ellu hè bè, cerca a esse male..."

36.mandatu da Paris hilton u 25/03/2009 17:19

What's the matter with you, dear Corsicans? You have the most beautiful land in the world, you still have something different, a culture, a language, moving songs (soon registered by UNESCO). But WHY, WHY are you allways crying???

35.mandatu da heliofobu u 25/03/2009 16:31

Iè ! Aspetà chi qualchi capimachja (a l'ego sprupositu, è ingordu di putere) si pesa, per fallà in carrughju a seguidallu cume pecure... Simu spezialisti per sublimà u populisimu è segassi annant'a pseudo eroi è legende mistificate da a nostra tuntia...
U dicraziatu populu Corsu always follows the leaders... Arf..

34.mandatu da machja u 25/03/2009 15:23

Aghju un cunsigliu a da , a tutti i"naziunalisti"; lasciate casca a vostra lotta, rientrate in casa vostra e campate cume la vi pare, chi issu" populu corsu" un vale a pena di scumbate per ellu. e aspitate cume l'altri, chi calchi omi si pesa, tandu veraremu.........

33.mandatu da ZIU ANTO U PURCAGHIU u 25/03/2009 11:36

O altore ,dà pupru l'esempiu. Fala a lampati u primu in Golu,chi per mé sarai ancu tu cmme tutti noi altri ;tuttu ogni unu guada l'interessu soiu in Corsica.Ma mi possu permette di di chi i corsi un so micca morti tutti in Ponte Novu.....

32.mandatu da circinelludiguagnenativupeliguagnesusosanguaversatu u 25/03/2009 11:27

Hè ! Manc'à dì m'aghj'à lampà... !!! è ind'un fiumi supranacciu in più ! Pà finiscia ind'u Tirreniu losciu è bruttu ?

31.mandatu da Culomba1 u 24/03/2009 23:45

Eiu ùn mi lampu indocu. Simu avvezzi avà. O allora lampmuli à elli...

30.mandatu da filidatu u 24/03/2009 21:46

ié lampemuci puru in golu s'elli vincenu torna i dui nannuli di sarkozy!
ma lampemuci in tavignanu s'elli vincenu giacobbi guazzelli è cumpagnia ,chì ùn valenu tante chjarasge ma per disgrazia mi pare chì parechje naziunalisti sianu pronti à aliassi cun elli, quì dinù bel'esempiu di schisofrenia quelli chì pretendenu luttà contr'à i clanisti sò pronti per ghjunghje à u pudere à alliassi cun un riprisentente di i più famosi di u "clan"

29.mandatu da Tux u 24/03/2009 21:38

Un articulu pienu di verità!

Cio chi dice un mi face micca piacè, ma so assai cuntentu chi qualunu l'abbia scrittu! Ghjera tempu chi no ci mettiamu à vedè a verità per pode agì, infine, contr'à i nostri demonii!

@Machja : cio chi tu dici hè vera. Ma se paghemu, hè parche vulemu bè pagà. Forse saria tempu di parlà corsu tra noi, d'un vutà micca più pè i clanisti, etc…

Sarà vera ciò ch'eddu scriva Sgaiuffu, ma ùn semu micca noi i malati, ghjè a nostra sucietà: a corsa, a francesa, l'auropea, u capitalisimu ecc.

Devemu fàla finita d'aspettà tuttu di Quassu, di u Statu, di l'Auropa, di u Celu. A sorte di a nostra sucietà hè ind'e nostre mani più che inde quelle di "Elli". Se noi parlemu corsu e un leghjemu più u Corse Matin è construiscemu impieghe corse chi marchjanu senza aspettà i soldi di Quassu (incu i soldi di i Corsi di a diaspora pudemu forse inseme creà una banca corsa, ditenuta da tutti i paisani chi averianu participatu?)
Soluzione ci ne pudemu trovà senza l'aiutu di l'Instanze Superiore…

28.mandatu da altore u 24/03/2009 20:59

o cristià ti feliciteghju pè stu cumentu... nunda à aghjustà... parenu fole ma ghjè vera ch'ell'hè cusì... disgraziata corsica... ci vole à sperà una reazzione à e territuriale... sè no lascemu torna camillù et Ange ghjittemuci puru à Golu!

27.mandatu da SERRA u 24/03/2009 19:19

vi n'avite legatu una :
so naziunalistu arrabiatu e votu ...ange fraticelli à e cantunale .

26.mandatu da cristianu clavieru u 24/03/2009 18:58

Manca qualcusella, chì mi pare un'antra malatia "naziunalista". Sò tutti quì per salvà a Corsica, a so lingua, "l'avvene di i so figlioli", sanu ch'ellu ci vole un'addunita per vince, ma si sbroglianu sempre per fà trè, quattru o cinque liste à e territuriale, duie o trè liste à e municipale, è fà di manera chì i nemichi sianu sempre l'altri naziunalisti. I clanisti facenu sempre l'unione ingiru à casgiu è prisuttu, parlanu corsu è ci compienu. Dice u francese republicanu: la france est une et indivisible, è u naziunalistu dice: la corse est une mais divisible ( in francese). Poveri à noi.

25.mandatu da GWM u 24/03/2009 14:22

sumerisimu

24.mandatu da machja u 24/03/2009 14:18

Eiu un vegu tantu mondu in carrughju per impone l'insignamentu di a nostra lingua, o per a difesa di u nostru populu.
quandu passu davanti e terazze di e cafè, tuttu u mondu leghje u "torche matin", in li paese i vecchji quand'elli fighjulanu a televiso, un capiscenu mancu cio ch'ellu dice u prisentatore in lingua nustrale.
Quale so e culpevule ? I clanisti ? i naziunalisti ? i tarruristi ?u statu francese ?
So cinquant'anni fa, certi corsi si ridianu di i so paisani chi parlavanu male u francese, a lingua corsa era a lingua di i disgraziati, di l'ignurànti, e assai si verguniavanu d'un sape parla issa lingua "maravigliosa"; u francese.
Oghje pagemu e nostre scimughjine .

23.mandatu da altore u 24/03/2009 12:51

ié o cauda.. canteremu "tutti razzoni, tutti fratelli ..." hè vera ciò chè tù dici ma ne vecu assai ch'ùn parlanu nè à a moglia nè à i figlioli...

22.mandatu da estrimei u 24/03/2009 12:49

o ZIU ANTO U PURCAGHIU ,
" CAMPA E LASCIA CAMPA . E TIRA AVANTI HE TOCCA ........... "
un pensu micca chi stu pruverbiu(ch'o cuniscia) , sie statu pensatu per ghjustificà stu rinunziu generale .(forse villiachisimu seria piu ghjustu che rinunziu)

21.mandatu da ZIU ANTO U PURCAGHIU u 24/03/2009 10:59

aio o quedda gjiente !!! A sapemu tutti chi noi altri corsi simu torti cume anché di ghjiacari. Alora femuci una raggio .Avemu tutti bisognu di qualcosa a un mumentu. Di soldi, d'aiutu e ancu di sentimenti .A francia sa pigliatu tutta a nostra piu bedda robba . Tutti l'omi e tutte é donne.Anoi ci tocca a suppurta. Ma eiu tengu stu pruverbiu varamente corsu;e vi dighu a tutti....CAMPA E LASCIA CAMPA . E TIRA AVANTI HE TOCCA ...........

20.mandatu da estrimei u 24/03/2009 08:01

o Culomba1 ,
"Andemu nantu à A Piazzetta per facci una risata è ci lamentemu ... "
ancu di grazia chi a piazzetta ci 'ajuta a metteci u sale in zucca.-ci'ole quantunque a tenne contu ch'o simmu figlioli di un Paese impastughjatu ! (e ne simmu ,ancu noi , rispunsevulli)-

19.mandatu da in cauda venenum u 24/03/2009 07:40

ALTORE QUANTU NE CUNOSCU CHI HANNU A MAMMA PINZUTA E CHI PARLANU CORSU E QUANTU NE CUNOSCU CHI HANNU U BABBU CORSU A MAMMA CORSA E CH'UN CAPISCENU UN'ACCA DI CORSU LEGHJI A PENA I NOMMI DI QUELLI CHI ERANU INDE CANTA U POPULU CORSU TANT'ANNI FA SERAI STUNATU
AGHJU LETTU UNA VOLTA STA FRASA
HE CORSU QUELLU CHI U PARLA O CHI A UNA VOLUNTA TREMENDA DI PARLA LU

18.mandatu da mamacorsicamamicaquidadipatrick u 24/03/2009 07:05

andemu nantu à a Piazzetta ci campemu, ci ricuniscimi ma a ci dicimmi tra no !

17.mandatu da Culomba1 u 23/03/2009 23:07

Andemu nantu à A Piazzetta per facci una risata è ci lamentemu ...

16.mandatu da Culomba1 u 23/03/2009 23:02

un avemu tempu à perde à pienghje, dumandemu ci solu ciò chì ci tocca à fà, à ognunu di noi! Hà a ragiò Circinellucosu...

15.mandatu da Piratella u 23/03/2009 22:59

Aiò o altore, l'amore ùn hà fruntiere!!

Ciò ch'ùn và hè ch'elli (elle) ùn li amparanu micca u corsu à e so moglie (o i so mariti)!!