Eccu dunque cum'ellu hè ricumpensatu u peghju mullizzu di l'umanità. Casabianda hè un duminiu di a piaghja aleriana di 1.900 èttare è chì appartiene à u ministeru di a Ghjustizia.

A feccia di l'umanità in un club-med
Stu penitenziariu hè unicu in Francia è s'entra cum'è innù e grande scole : nant'à "dossier". E piazze sò care è riservate à ciò chì l'umanu face di peghju : assassini, viulatori è pedoffili.

Casabianda hà l'onore di vede un invitatu di marca : Emile Louis, u mostru di l'Yonne, cundannatu una prima volta per avè torturatu è viulatu a so figliola è a so moglia è una segonda per avè viulatu è tombu sette povere zitelle malate mentali.

Ancu u golf
A specificità di u penitenziariu : i "prigiuneri" sò in meza libertà. Travaglianu a matina in u duminiu agrìculu, à u sole è à l'aria pura. Quì ùn ci hè nè muru nè mirador, nè mancu prublema di suprapupulazione carcerale : e cèllule sò grande è spaziose. U dopu meziornu si divertiscenu : spassighjata in a magnifica furesta, dui corti di tennis è di volley, ponu ancu fà planche à voile è golf.

U parloir hè quì illimitatu a dumenicata. Per infurmazione, in Fresnes hè limitatu à 20 minuti à mese.

È u più bellu hè ch'ella esiste ancu una piaghja riservata à i prigiuneri ! Da dumandassi s'ellu si parla veramente d'un penitenziariu. Mancu in i sogni di Séguéla ùn si trova affare sìmule !

Hè cusì chì l'amministrazione cuncepisce a Corsica : una terra d'esiliu pè i peghju assassini di l'umanità chì ci campanu cum'è rè. In l'Antichità Roma avia digià mandatu ghjente in esiliu, cum'è Sèneca. Ma dipoi, e cundizioni di vità si sò megliurate è si battenu per esse trasferiti in stu vituperiu di Casabianda.

Prison Break pè Emile Louis ?
Una volta a pena compia, ùn si sà nunda nant'à ciò chì sti prigiuneri di club-med diventanu. Si dice chì certi si sarianu stallati in Corsica. Ma infurmazioni ùn ci n'hè.

Ma l'incidenti sò stati pochi. L'ultimu era in u 1977, quandu un prigiuneriu hà tombu un guardianu.

Ah, ultimu affare. Venimu d'amparà chì un prigiuneru si n'hè fughjitu: in permissione, s'hè "scurdatu" di vultà in a so stanza.