A Corsica hà in cumunu cù u Tibet u cultu per Buddah, o piuttostu per vutà.

Serà per quessa ch'ella hè nata a frenesia di u sustegnu à u populu tibettanu ind'è noi ? Bandere quind'è culandi, appiccicatoghji "Free Tibet" nant'à e vitture, t-shirt, pin's è avà ancu manifestazioni...

Ciò ch'ellu si pò dì hè chì l'organizazione di i ghjochi olìmpichi in China serà stata l'occasione pè certi di scopre sta pruvincia sott'à duminazione chinese.

Pocu impreme si certi ùn l'anu scupertu ch'è quist'annu, ma eccu : oghje ci vole à sustene u populu tibettanu. C'est tendance, sopr'à tuttu per quelli ch'ùn ci anu mai messu i pedi. Almenu, passate per qualchissia di bravu, di sìmpaticu, tuttu u cuntrariu di i corsi.

A Francia (è a Corsica) di u 2008 si sò trovi una nova causa da sustene : i bravi tibettani contr'à i gattivissimi chinesi.

Tantu peghju sì a situazione hè più cumplessa ch'è quessa, sì u Dalai Lama ùn rapresenta ch'è un currente minoritariu di u buddisimu, si i frati buddisti difendenu una sucetà arcaica è inghjusta.

Forse ùn basta micca di leghje a pagina di Wikipédia nant'à u Tibet per diventà un espertu in geopulitica tibettana.

Ma ùn face nunda, piace à u bobo di u 2008 di sustene una causa persa à l'astru latu di u mondu. Li permette d'avè bona cuscenza : difendu u Tibet, sò in u bon latu, facciu parte di i bravi.

Eri u Chiapas, oghje u Tibet... Finiti i ghjochi di settembre, ùn si ne parlerà più.

In tantu, semu à più di 130.000 morti in Birmania, siguramente u peghju guvernu ind'u mondu. Induve sò i bravi bobo per difende i diritti di l'omu in stu paese d'Asia ? È di e dittature africane ch'ùn interessanu à nimu ?

Ma ùn vale a pena d'andà a circà più luntanu. Mentre chì u passagiu di a fiamma olìmpica in Francia pruvucava l'isteria di i bobò amatori di velib', avemu vistu ancu certi intellettuali è omi pulitichi francesi difende l'obligazione d'insignamentu di a lingua tibettana ind'è scole...

Hè cusì a Francia in u 2008. Serà megliu di difende u salvamentu di a lingua tibettana ch'è di ciò ch'elli chjamanu e lingue regiunali...