L'Americani anu riesciutu à regulà u prublemu di e so minorità : anu datu à l'indiani una spezia d'autonomia nant'à un territoriu custrettu. Cusì sò nate e "riserve indiane". Dopu, per avè a pace, l'anu lampati unepochi di casinò è d'alcolu per ch'elli possinu distrucesi trà d'elli. Almenu, ùn facenu più cacà à nimu.

Serà per preparà a prussima evuluzione istituziunale di a Corsica chì i publicitarii parigini pagati da l'ATC anu sceltu stu slogan ?

U fattu si stà chì a Corsica s'assumiglia di più in più à una riserva d'indìgeni, digià minuritarii ind'è elli.

Ci vole à dì chì pettu à u trionfu di u soldu è à a mundializazione ch'arruvineghja tuttu, hà da esse di più in più difficiule per u picculu populu corsu di cuntinuvà à tene a so cultura, a so lingua è a so identità.

U turisimu hà acceleratu l'acculturazione è ci hà arregatu u so lottu di disguasti : pippol conni, trafficoni in tutti i gèneri, sonniu americanu pè i disgraziati. D'avanti à st'afflussu di soldi da fà girà i capi, i corsi si sò messi à vende a so terra è a so anima. A saperanu Séguéla è Clavier. Welcome to the pleasure !

Hà ragiò l'ATC, a Corsica hè digià una riserva. Ùn ci manca più ch'è da mette a beretta misgia è a cinta rossa per andà à cantà l'estate innù e pizzerie per fà crede à i turisti chì u populu corsu hè sempre vivu.

Ah nò hè vera, quessa esiste digià.


tags : vacances tourisme corse