U discorsu ufficiale di i membri hè chì l’affare li permette di pudè piglià nutizie di l’unu o di l’altru, di mantene l’amicizie cun ghjente chì ùn si ponu scuntrà abbastanza spessu, di pudè mandà l’auguri di capu d’annu o di pregà bona festa è bon aniversariu più fàciule è tralallà… Un cornu sì ! Sò pochi à ricunnosce chì l’interessu maiò hè di buscassi à qualchissia, sta manera virtuale essendu sempre percepita cum’è quella di i pinzuti for’di mondu chì ùn cunnòscenu à nimu nù e so periferìe tamante…

A segonda a vi dicu eiu hè sta vuluntà ch’elle anu e ghjente d’impone è di ficcà a so chignaccia nant’à u web per circà d’esiste. È custì tandu si càmpanu. Tutti tutti vi dicu. È tuttu u mondu ci si monta una sega di quelle : imbelliscenu e donne, si trasformanu i tippi, ingiuvanìscenu i vechji è invèchjanu i (troppu) giòvani, citatini làmpanu elogiu à i so paesi cari chì ùn ci còllanu mai è paisani mòstranu ch’elli ùn sò cusì selvàtichi. Ci sò i belli, i grassi è i groppitondi, selibatàrii sunnièghjanu di truvacci l’amore è l’accuppiati si ponu tene qualcusella à u caldu sì casu o mai, barbuti è finochji, sburgnoni è santochji, pulitichi è persunalità cunnisciuti (o micca abbastanza), prufeziunali o disimpiegati, intelettuali è closce. Tutta sta ghjente si cappia alegra di pudè sciaccà l’ultime fottò di e so scimie o di e so surtite cun l’amichi o in famiglia.
Ùn sciàccanu ancu u so estru di u mumentu ?! Quella palesa à tutti ch’ella hè in depressione per attizzassi qualchì porcu in dirotta è l’astru vi lampa à scrittura grassa ch’ellu hè in piena forma soca per fà cagà à l’anziana amica chì l’hà cappiatu cum’è una calzetta intufunata.

Mentre ci lagnemu di sta pazzìa pè a securità à tutti i patti, primura mundiale di i guverni è di e pulizze di tutti i paesi, quelli scrianzati fàcenu u so travagliu à a pulizza chì tandu sà tuttu di a vita, di l’orientazioni pulìtiche, culturale, religiose è sessuali di i so suspetti, è ancu di l’astri chì ùn dumàndanu nunda.

I senterete avà, tutti i casch’è pienghje di a creazione chì fùghjenu à stanghittassi in casa appressu à facciabeccu. Hi ! Hè tutta ropa per i pinzuti, eiu ùn ci entru in ste tràppule quì. U veru Corsu si ne stà à comptoir à beie u so pastizzu troppu zeppu è à manghjà e so chips passate è secche secche ratachjendu cun l’amichi appressu à tutti e guappe chì pupulèghjanu stu mondu.

Perchè st’ànime perse è gioiosi murtuloni chì pascenu è venenu pè Facciabeccu, ci vulerà à ricunnosce chì s’elli ci si vèdenu, ùn si ponu sente...

Tenì, metitàtevila quessa !

U famosu presentadore spechjettinu, Jean-Luc Delarue, avia invitatu unepoche di ghjente esciute di a « TV Realità » per cunnosce oghje u parcorsu d’ognunu.

Trà e celebrità presente, l’anzianu ghjucadore di ballò nustrale, Pascal Olmeta, chì avia vintu, ellu, « La Ferme Célébrités » (prugrama di TF1). Sinu à quì, tuttu va bè...

Ma ùn era micca prevista cusì, secondu quellu chì hè dinù presidente di « Un sourire, un espoir pour la vie ». A produzzione li avia dettu à u telefonu, chè in u mentre di l’emissione, puderia parlà ghjustappuntu di u so associu chì vene in aiutu à i zitelli soffrendu di maladie gravule.

Ùn fermava chì qualchì seconda nanzu à u genericu finale, quandu Jean-Luc Delarue li hà lasciatu a parulla. Pascal Olmeta s’hè puru incazzatu è li hà subitu dettu, chì s’è l'avia sappiuta, si ne seria statu in Bastia. Un bellu scontru chè nò vi prupunimu di rivive in video.

O Pasquà, gloria à tè !

Azezu per via di u tempurale, Ange Santini hà dichjaratu subitu : "s'elli volenu l'indipendenza, ch'elli a piglinu!". Hè vera chì st'ultimi tempi, cresce a zerga di i Corsi contr'à i "lucchisoli capicursini".

U prublema hè ch'ellu costa caru u Capicorsu à a cummunità isulana. Prublemi di cunnessione elettrica, micca cunnessione Internet, prublemi di strade, prublemi di cummunicazione radiofonica è via culturale... S'omu mette d'accantu i Susini è l'Albertini, u puttachju dice ch'elli serianu più di ceppu tuscanu, pinzutu, purtughese o arabu chè niulincu...

Ancu a so squadra di ballò, a Squadraccia Capicursina si face rimarcà nant'à tutti i terreni di Corsica. À chì zappa u terrenu, à chì face u maccu è ùn corre micca, à chì face a scimia à ghjucà cù e mani. Quill'altru trova a scusa di u ballò per inturcà si in ogni paese... Un antru si piglia per un cane à a battuta... U più ch'elli si facenu rimarcà hè per l'azzuffi è e cazzuttate. Avvezzi à e scunfitte, a terza mi-temps, a facenu nanzu à u macciu... Per un antru annu, i dirigenti di u club, pensanu avà à creà un Panzarottu Boxing Club...

In quantu à u FCCL, si dice prontu à fà azzione al di là di e fruntiere storiche di u Capicorsu. Dumanda a creazione d'una leia marittima à bon pattu trà u Capicorsu è u cuntinente corsu. Rivendicheghja dinù a pussessione di a cità di Bastia, incù u tunnellu è a citadella. Cum'è in Ghjerusaleme, Bastia s'appronta à campà a so prima intifada...

In u 1962, l'isula cuntava 160 000 abitanti. Era à l'abbandonu, e ghjente eranu à l'addisperu. Sò ghjunti i prugetti di a SOMIVAC per u SVILUPPU... Mudernisazione di l'agricultura corsa à prò di i pedi neri... Apertura di a Corsica à u turisimu...

Oghje, dopu a Guyane, hè in Corsica ch'ella s'accresce u più a demugrafia: 34.000 persone di più in mancu 10 anni. Face una media di circa 3.500 à l'annu. Ùn andate à circà a natalità... Sò belle calme e notte in Corsica. Altru restu, tutti i sciffri sò verdi! U BTP và, tuttu và. È ancu, s'ella ùn c'era sta viulenza endemica, a Corsica sarebbe l'America!

Scalanu i ritirati d'Italia o di Francia à buscà si un paradisu à u sole. Scalanu Purtughesi per custruì i so casamenti. A maiò parte di i figlioli di i primi immigrati magrebini ùn la facenu à integrà si. Si custituiscenu diverse cummunità. E municipalità a si provanu di cumprà terreni per ch'elli possanu stallà si i Corsi, appena di più in a muntagna chè e custruzzione di l'industrali o di i pippoli chì spuntanu vicinu à u mare...

Secondu l'ultimi studii dispunibili, a trasmissione naturale di u corsu tuccherebbe trà 5 % di i zitelli, mentre hè a Corsica u solu rughjone francese duve a lingua di l'immigrazione hè trasmessa à a terza generazione. Hè quessu u segnu d'una parte di a nurmalisazione di i Corsi è da l'altra, di a cummunitarisazione di a pupulazione isulana.

Soca, l'avvene di i Corsi serà di ritruvà si in amicale, urganizendu rave pastizzate party, cum'è l'Indiani chì anneganu in l'alcool è a droga u so addisperu di vede u so populu smarisce per sempre... Serà quessa a via di u mantenimentu identitariu... Ma a moda hè piuttostu indiata ver di e serate cucaina... À 80€ u grammu, vi stona a multiplicazione di l'arrubbecci?

A faranu i puteri publichi à dà i mezi à i scalaticci d'amparà u corsu, di cunosce a nostra storia??? Ma postu ch'ùn la facenu mancu per i nativi, ci vole à ricunosce ch'ella hè poca a speranza...

Allora, trà u pessimisimu di a ragiò è l'uttimisimu di a vuluntà, a vi pensate chì u boom demugraficu serà una furtuna per i Corsi o u segnu di a so morte?

Avemu incuntratu à Hubert Timpesta è à Patrizia Gattaceca per dumandalli ciò ch'elli speranu per l'annu novu.

L'occasione per noi di pregavvi un annu di pace è di salute, cun menu castichi è rompistacche...

In entrata : Aviate previstu salmone affumaticatu, òstrice, foie gras, un pain surprise... Lasciate corre u pesciu ! Prima chì u salmone hè caru. È cum'ellu vene da luntanu, cuntribuite à spende l'energia. Ciò chì ùn và micca cù e vostre bone resoluzioni pè l'annu novu di participà à salvà u pianeta !

Invece, manghjate puru l'òstrice corse. Sò più bone è ricircate fora di ind'è noi. L'avemu sopr'à locu, allora prufittemune ! Cù un sprichju di limone (nustrale è micca trattatu), hè una campazione !
U foie gras, perchè micca. À cundizione ch'ellu ùn sia micca quellu di u Gers ! Sceglite un foie gras corsu ! Iè chì esiste ! Ne truverete di siguru vicinu à ind'è voi. Allora fate un sforzu !

In quant'à u pain surprise, fatelu da per voi ! Ùn hè tantu cumplicatu. Di siguru, piglierete prudutti micca impurtati è micca industriali : una fetta di furmagliu pecurinu o caprunu, una fetta di prisuttu, una di furmagliu di porcu... È s'è vo ùn pudete passavvi di i prudutti di u mare, andate à u mercatu, cumprate zinzì per esempiu. I piscadori corsi si feranu un piacè di cunsigliavvi.

U piattu principale : Aviate previstu a dinde aux marrons... Fatela finita ! Una bona pulenda cun brocciu, figatellu è ove fritte. Cusì semplice è cusì bonu. A farina pisticcina, si trova in ogni locu. L'ove ? In n'importa chì eppisseria. Pè u brocciu è u figatellu, andate à vede direttamente un pruduttore. Ùn cunniscite à nimu ? Dumandate puru à A Piazzetta chì elli sì chì ci capiscenu.
Altra suluzione : u caprettu cù i pomi. Cumprate tuttu ind'è u vostru macellu è dumandate prudutti corsi ! Ùn vi vergugnate micca !

Da evità quantunque : A pulenda cù i knacki. Francamente, lasciate corre.

U dulciume : a tradiziunale bûche... Aiò ! Piantate tuttu ! Sbattulate o chè ? Dop'à u furmagliu cù a cunfittura di fichi, prupunite clementine, brocciu cù l'acqua vita, una torta pisticcina, un fiadò... Troppu semplice ? Allora fate une schjuma di brocciu, aghjustate qualchì goccia di mele, pisticciuli di canistrelli cù amàndule è marrons glacés. Imbulighjate è date à stu sugillastòmacu un nome orìginale pè impressiunà i vostri invitati.

È per beie ? Surtite da l'urdinariu, basta cù stu Champagne ch'ùn hè mancu bonu ma ch'ellu ci vole à beie per fà cum'è tuttu u mondu. Ci n'hè abbastanza vini corsi nò ? Cubi di Barbu pè i briaconi è rossu di Patrimoniu o di u Sartinese pè i palàtichi fini. Per esse di più "tendance", sappiate chì ci hè bunissimu "muscat pétillant" fattu in Corsica !

L'avantagi : I prudutti corsi esistenu sempre (per avà...) è i cunsumatori ch'è no semu anu sempre a scelta. Allora, perchè ùn micca principià l'annata fendu un attu militante chì ùn vi custerà micca un trasferimentu in Parigi cù a DNAT ?

In più, s'è vo site dillusu, puderete sempre andà à lagnavvi direttamente ind'è i pruduttori ! Ma aspettate appena, in stu periudu di feste sò appena sott'à pressione è pigliate i risichi.

Eccu, s'è vo ùn aviate edee per u vostru ripastu di u 31 avà sapete chì fà. Attenti à l'eccessi è à a pulizza nant'à e strade.

È cum'ellu dice Jean-Pierre Acquaviva : bona robba !

U fattu di u rè?
Dopu l'affare Clavier-Rossi, dopu a passata nant'à a fine di a publicità nant'à a televisò publica è tira avanti è tocca, pare chì Nicolas Sarkozy s'inchjudessi in u so palazzu di l'Elysée senza tene contu di u parè ne di i so ministri ne di e ghjente. L'amnistia di Jean-Charles Marchiani hà tutti l'attributi di u fattu di u rè. Secondu u parchettu di Parigi, Marchiani ùn currispundia micca à u prufilu di e ghjente chì serianu capace à benefizià d'una grazia presidenziale. S'ellu ùn hè micca statu liberatu per ragione ughjettive, serà per via di a so amicizia incù Carlu Pasqua, è via incù NS? Tandu sì, seria una decisione inghjusta. Chì hà soldi è amicizia torce u nasu à a ghjustizia...

Un ghjornu lione, u lindumane scruccone?
In quantu à l'amichi di Jean-Charles Marchiani, ramentanu à sicutera u so eruisimu. Ùn hè ellu chì hà permessu a liberazione d'ustagi francesi à u Libanu è in Busnia? A dice Kauffmann à U Figaro : Marchiani est un héro ! Ùn ci scurdemu ch'ellu hà messu a so personna in periculu per a Republica. Quale hè chì ne pò dì altrettantu? B. Hamon, S. Royal, M. Aubry, O. Besancenot? A quistione hè di sapè s'è u so eroisimu passatu li permetterà di francà si di e lege. Dopu toccu u so quota di devuzione à a Republica, omu si puderà permette tuttu?

Tutti manghjoni?
Soprattuttu, pare chì l'affare Marchiani caschessi propiu male per a vita publica. U PS si trova affangatu in letiche interne, dopu a cumedia di u cungressu di Reims è di a froda presunta, ghjunghje l'affare Julien Dray... U risicu hè ch'elli n'avissinu una techja i citadini di cuntà e cazzarole di l'unu è di l'altru. Hè cusì ch'ellu colla l'estremisimu.

È voi, chì ne pensate di J-C. Marchiani?